ސަރުކާރުން ޓެކްސީގެ ހިދުމަތަށް ނިކުތުމަކީ ސަރުކާރުގެ ސިޔާސަތުތަކުގައި މިސްރާބެއް ނެތްކަން ދޭހަވާކަމެއްކަމަށް އިދިކޮޅު އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

ސަރުކާރުން މިއަދު ވަނީ މާލެ ސަރަހައްދުގައި ޓެކްސީގެ ހިދުމަތްދިނުމަށް އެމްޓީސީސީއާ ހަވާލުކޮށްފައެވެ. މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ, ޒަމާނުއްސުރެ ރާއްޖޭގައި އާއްމު ރައްޔިތުން ކުރާ ޓެކްސީ ވިޔަފާރީގެ ތެރެއަށް ސަރުކާރުން ވަދެ، ޓެކްސީ ޑްރައިވަރުންނާ ވާދައަށް ސަރުކާރުން ނިކުތުމަކީ ސަރުކާރުގެ ސިޔާސަތުތަކުގައި މިސްރާބެއް ނެތްކަން ދޭހަވާކަމެއް ކަމަށެވެ.

ޝާހިދު ވިދާޅުވީ ސަރުކާރު ވާންޖެހޭނީ އާއްމު ވިޔަފާރިއަށް ފަހި މާހައުލެއް ގާއިމްކޮށް، ދިމާވާ ގޮންޖެހުންތަކަށް ހައްލު ހޯދައިދީ، ރެގިއުލޭޓްކޮށްދޭ ފަރާތަކަށް ކަމަށެވެ. އާއްމު ހުރިހާ ވިޔަފާރިއެއްގައި ސަރުކާރާ ވާދަކުރަން އާއްމުންނަށް ޖެހުމަކީ ދެކޮޅު ޖެހޭ ގޮތެއް ނޫންކަން ފާހަގަކުރައްވަމުން ޝާހިދު ވިދާޅުވީ ކޮންމެ ކަމެއްގައިވެސް ފެނިގެން މިދަނީ ސަރުކާރުގެ އަމާޒެއް ނެތްކަމާއި، ދައުލަތް ހިންގާނެ ފައިސާ ހޯދާނެ ގޮތެއް ނޭނގިގެން އުޅޭ މަންޒަރު ކަމަށެވެ.

ވަކިން ޚާއްސަކޮށް، ސަރުކާރުން ޓެކްސީގެ ޚިދުމަތް ފޯރުކޮށްދިނުމާ ބެހޭ ގޮތުން ސަރުކާރާއި ސަރުކާރު ހިންގާ ޕާޓީގެ އިސް ބޭފުޅުން ދައްކަވާ ވާހަކަތައް ދިމާނުވުމަކީ ސަރުކާރަށް ވާންވީ ގޮތާއި ވަމުންދާ ގޮތް ނޭނގޭ ކަމުގެ ހެއްކެއްކަމަށް ޝާހިދު ފާހަގަކުރެއްވިއެވެ.

ސަރުކާރުން ޓެކްސީގެ ހިދުމަތްދޭން ނިންމުމުން ޝާހިދު އެކަމަށް ފާޑުވިދާޅުވެފައިވާއިރު، ޓެކްސީގެ ހިދުމަތާ ގުޅޭގޮތުން ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ އެމްޓީސީސީން ޓެކްސީގެ ހިދުމަތް ދޭނީ ވިޔަފާރީގެ އުސޫލުން ނޫންކަމަށެވެ. އެގޮތުން އެމްޓީސީސީން ޓެކްސީގެ ހިދުމަތްދޭނީ އެކުންފުނިން މިހާރުވެސް ދަތުރުަތުރުގެ ހިދުމަތްދެމުންދާ ގޮތަށް އަސާސީ ހިދުމަތެއްގެ ގޮތުގައި ބަލައިގެން ކަމަށެވެ. 

މިނިސްޓަރު އަމީން ވަނީ އެމްޓީސީސީން ޓެކްސީގެ ހިދުމަތް ފެށި ނަމަވެސް އެކަމުގެ ސަބަބުން މިހާރު ޓެކްސީގެ ހިދުމަތް ދެމުންދާ ފަރާތްތަކަށް ގެއްލުން ނުވާނޭކަމަށް ވިދާޅުވެފައެވެ. 

ސަރުކާރުގެ ޓެކްސީ ލައިންގެ ހިދުމަތް ދޭން ފަށާނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގައި މި އަހަރުގެ ތެރޭގައި މި ހިދުމަތް މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓަށް ދޭން ފަށާނެ އެވެ. ދެ ވަނަ ފިޔަވަހީގެ ދަށުން 2026 ވަނަ އަހަރާއި 2027 ވަނަ އަހަރު ވިލިނގިލި އަދި ތިލަފުއްޓަށް އެ ހިދުމަތް ތައާރަފްކުރާނެ އެވެ.