ޝަރީއަތް ނިމެންދެން މާފުށީ ޖަލުގައި ބަންދުކޮށްފައި ހުރި ބިދޭސީއަކު މަރުވެއްޖެއެވެ.
މޯލްޑިވްސް ކަރެކްޝަނަލް ސާވިސްއިން ބުނީ ޖަލުގައި ހުއްޓައި މަރުވެފައިވަނީ ނައިޖީރިއާގެ ރައްޔިތެއްކަމުގައިވާ އުމުރުން 35 އަހަރުގެ އިމޭނުއަލް ޖޯންޕޯލް އޮކޮނާޗީ އެވެ.
ކަރެކްޝަނުން ބުނީ އޭނާ މަރުވީ މިއަދު ޔާޑްގައި އެހެން މީހުންނާއެކު ކުޅެން ހުއްޓާ ކުއްލިއަކަށް ވެއްޓުމުން ފަރުވާދެމުން ދަނިކޮށް ކަމަށެވެ. އޮކޮނާޗީ ވެއްޓުމާއެކު ވަގުތުން އޭނާ ވަނީ މާފުށީ ޖަލުގެ މެޑިކަލް ސެންޓަރަށް ގެންގޮސް އަވަސް ފަރުވާ ދިނުމަށްފަހު، 4 މިނެޓްތެރޭ މާފުށީ ހޮސްޕިޓަލަށް ގެންގޮސް ފަރުވާ ދޭން ފެށިކަމަށް ކަރެކްޝަނުން ބުންޏެވެ. އޮކޮނާޗީގެ މަރު ކަނޑައަޅާފައި ވަނީ 17:20 ހާއިރުއެވެ.
އޮކޮނާޗީ ބަންދުކޮށްފައިވަނީ މަސްތުވާތަކެތި ގެންގުޅުމާއި، ބޭނުންކުރުމާއި ވިޔަފާރިކުރުމުގެ މައްސަލައެއްގައެވެ. އޭނާއަކީ އެއްވެސް ދާއިމީ ބައްޔަކަށް ފަރުވާހޯދަމުން އަންނަ މީހެއް ނޫންކަމަށްވެސް ކަރެކްޝަނުން ބުނެއެވެ. މޭނުއަލް ޖޯންޕޯލް އޮކޮނާޗީ މަރުވުމާ ގުޅިގެން ކަރެކްޝަނުން ވަނީ އެކަން އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަދި ޕްެރޮސެކިއުޓަރ ޖެނެރަލްގެ އޮފީހަށް އަންގަވާފައެވެ.
Advertisement
This content is created and paid for by advertisers and does not involve Voice Journalists
