ރައްޔިތުންގެ މަޖިލީހުގެ ކުރީގެ ކާށިދޫ ދާއިރާގެ މެންބަރު ޢަބްދުالله ޖާބިރުގެ ޔޮޓް ޓުއާސް މޯލްޑިވްސް ކުންފުނީގެ އެކައުންޓް، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ގާނޫނާ ހިލާފަށް ފްރީޒްކޮށްފައިވާ ކަމަށް ސުޕްރީމް ކޯޓުން އިއްޔެ ހުކުމްކޮށްފި އެވެ.

ސިވިލް ކޯޓާއި ހައިކޯޓުގެ ނިންމުން ސުޕްރީމް ކޯޓުން ބާތިލްކޮށް، މީރާއިން އެކައުންޓްތައް ފްރީޒްކޮށްފައި ވަނީ ގާނޫނީ އުސޫލުތަކާ ހިލާފަށް ކަމަށް ސުޕްރީމް ކޯޓުން ބުނެފަ އެވެ.

އެ މައްސަލަ ބެއްލެވީ ފަނޑިޔާރު މުހައްމަދު އިބްރާހިމް އާއި އަޒްމިރަލްދާ ޒާހިރު އަދި އައިޝަތު ޝުޖޫން މުހައްމަދުއާ އެކު ތިން މެންބަރުންގެ ބެންޗަކުންނެވެ. މި މައްސަލަ ބެއްލެވި ތިން ފަނޑިޔާރުންގެ އިއްތިފާގުން މި ހުކުމް ކުރެއްވިއެވެ.

ބެންޗުގެ ރިޔާސަތު ބެލެހެއްޓެވި ފަނޑިޔާރު އަޒްމިރަލްދާގެ ރައުޔުގައިވާ ގޮތުން ރިސޯޓް ކުލި ދެއްކުމާ ގުޅޭ ގޮތުން ޓޫރިޒަމް މިނިސްޓްރީ އާއި ޔޮޓް ޓުއާސްއާ ދެމެދު އެއްބަސްވުމެއް އޮތް ނަމަވެސް ޓެކްސް އެޑްމިނިސްޓްރޭޝަން ގާނޫނުގެ ދަށުން ފިޔަވަޅު އެޅުމުގެ ބާރު މީރާއަށް ލިބިގެންވާ ކަމަށް ނިންމުމަކީ ގޯހެކެވެ.

އެއްބަސްވުމުގައި ބުނެފައި ވަނީ ކުލި ނުދައްކާ ހާލަތެއްގައި ޔޮޓް ޓުއާސް އިން ދުވާލަކު ދައްކަން ޖެހޭނީ ނުދައްކާ އަދަދުގެ 0.5 އިންސައްތައިގެ ރޭޓުން ކަމަށެވެ. އަދި ކުއްޔާއި ޖޫރިމަނާ ގަވާއިދުން ނުދައްކައިފިނަމަ އެއްބަސްވުން ބާތިލުކުރުމުގެ ބާރު ޓޫރިޒަމް މިނިސްޓްރީއަށް ލިބިގެންވާކަން ވެސް އެ ރައުޔުގައި ފާހަގަކޮށްފައިވެ އެވެ. ކޮންޓްރެކްޓުގެ އެއް ބައިވެރިއަކު ގަވާއިދަކުން ތައާރަފްކުރާ އެހެން ހައްލެއް އެއްބަސްވުންތަކުގެ މައްޗަށް ހިނގަންޖެހޭ އެއްވެސް ގާނޫނީ ސަބަބެއް ނެތް ކަމަށްވެސް އަޒްމިރަލްދާގެ ރައުޔުގައި ވެއެވެ. 

ޔޮޓް ޓުއާސްއާއި ޓޫރިޒަމް މިނިސްޓްރީގެ ދެމެދުވާ އެއްބަސްވުމުގެ ދަށުން ކުލި ދައްކަންޖެހޭ ތާރީހުން ފެށިގެން 30 ދުވަހުގެ ތެރޭގައި ކުއްޔާއި އުވާލާފައިވާ ގެއްލުމުގެ ބަދަލު ނުދައްކައިފިނަމަ އެއްބަސްވުން ބާތިލްކުރުމުގެ އިޚްތިޔާރު ޓޫރިޒަމް މިނިސްޓްރީއަށް ލިބިގެންވެއެވެ.

ޓޫރިޒަމް މިނިސްޓްރީ އިން ޔޮޓް ޓުއާސްއަށް ހއ. އަލިދޫ  ލީޒްކޮށްފައިވަނީ 2005 ވަނަ އަހަރުއެވެ. އަދި ހއ. ބީނާފުށި އަދި ކަނާލިފިނޮޅު ލީޒްކޮށްފައިވަނީ 2013 ވަނަ އަހަރުގައެވެ. ހއ. އަލިދޫ، ހއ. ބީނާފުށި އަދި ކަނޑާލިފިނޮޅުގެ ކުއްޔާއި ޖޫރިމަނާ ފައިސާ ނުދެއްކުމުން މީރާއިން 2017 ވަނަ އަހަރު ވަނީ ޖާބިރުގެ އެކައުންޓްތައް ފްރީޒްކޮށްފައެވެ.