މާލޭގައި މިފަހުން ހިނގަމުންދާ ސިލްސިލާ މާރާމާރީތަކާ ގުޅުންހުރި މީހަކު ފިލައިގެން މެލޭޝިޔާއަށް ދިޔުމުން، ރާއްޖެ ގެނެސް ހައްޔަރު ކޮށްފިއެވެ.

މި މައްސަލާގައި ހައްޔަރު ކޮށްފައި ވަނީ، މީހެއް ގައިގައި މަރުތޭލަކުން ޖެހި މައްސަލާގައި ތުހުމަތު ކުރެވޭ، ޏ. ފުވައްމުލަކު، ދިގުވާޑު، ބަނަފްސާގެ، ހުސައިން ޢަރީޝް (31އ) އެވެ. އޭނާ އަކީ، މަސްތުވާތަކެއްޗާއި، ތޫނު ހަތިޔާރު ބޭނުން ކުރުމާއި މާރާމާރީ ހިންގުމުގެ ރިކޯޑް އޮންނަ މީހެކެވެ.

ފުލުހުން ބުނީ، މާލޭގައި މިހާރު ހިނގަމުންދާ މާރާމާރީތަކުގެ ތުހުމަތު ކުރެވޭ އަދި ނުކުރައްކާތެރި ކުށްތަކަށް އަރައިގަތުމުގައި ބައިވެރިވާ ކަމަށް ތުހުމަތު ކުރެވޭ 31 އަހަރުގެ ދިވެހި ފިރިހެނަކު މިއަދު ހައްޔަރުކޮށްފައިވާ ކަމަށެވެ. 

Advertisement

ފުލުހުން ބުނި ގޮތުގައި، މި ފަރާތް ފުލުހުންގެ ބެލުމުގެ ދަށަށް ގެނެސްފައިވަނީ ހައްޔަރު ކުރުމަށް ކޯޓު އަމުރެއް ނަގާފައިވަނިކޮށް، މެލޭޝިޔާއަށް ފުރައިގެން ދިއުމުންނެވެ. އެގޮތުން، މެލޭޝިޔާއަށް އޭނާ ވަނުން ހުއްޓުވައި، އެހެން ފްލައިޓެއްގައި ރާއްޖެ ގެނައުމަށްފަހު ވެލާނާ އިންޓަރނޭޝަނަލް އެއަރޕޯޓުން ފުލުހުންގެ ބެލުމުގެ ދަށަށް ގެނެވުނު ކަމަށް ބުންޏެވެ. 

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ. 

މި މަހުގެ 4 ވަނަ ދުވަހުގެ ރޭ، އައިޖީއެމްއެޗު ކައިރީގައި ހުރި މީހަކަށް އަމަލާދިނީ ސައިކަލެއްގައި ދިޔަ ދެ މީހެކެވެ. އޭގެ ތެރެއިން މަރުތޭލުން އެ މީހާގެ ބޮލުގައި ޖެހީ ސައިކަލުގެ ފަހަތުގައި އިށީނދެގެން އިން މީހާ އެވެ.

އެ ވަގުތު އައިޖީއެމްއެޗު ކައިރީގައި ހުރި ފުލުހަކު އެ ތަނަށް ދިޔަ ނަމަވެސް، ހަމަލާދިން މީހުން ވަނީ ފިލައިފަ އެވެ. އެ މީހުން ސައިކަލްގައި ފިލައިގެން ދާން އުޅެނިކޮށް ސައިކަލް ސްޓާޓް ނުވުމުން ފިލައިގެން ދިޔައީ ދުވެފައެވެ.