އިސްރަށްވެހިންނަށް ހާއްސަ މާހައުލެއް ރަށްރަށުގައި ގާއިމްކުރުމުގެ މަސައްކަތް ސަރުކާރުން ކުރަމުންދާ ކަމަށް ސޯޝަލް މިނިސްޓަރ ޑރ. ޢާއިޝަތު ޝިހާމް ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ޕީއެސްއެމްއާއި ރައީސް އޮފީހުން ގުޅިގެން ބޭއްވި "އަހާ" ފޯރަމްގައި ވާހަކަދައްކަވަމުންނެވެ.
މި ފޯރަމްގައި ވާހަކަދައްކަވަމުން މިނިސްޓަރ ވިދާޅުވީ އަތޮޅު ކައުންސިލުތަކާއި މަޝްވަރާކޮށްގެން އެ އަތޮޅުތަކުގައި އިސްރަށްވެހިން އެއްވެ އުޅެވޭނެ ތަންތަން މިނިސްޓްރީއިން ފާހަގަކުރާނެ ކަމަށެވެ. އިސްރައްވެހިން އެކުގައި އުޅެވޭނެ މާހައުލެއް ޤާއިމްކުރުމަށް ރާއްޖޭގެ ހުރިހާ ކައުންސިލްތަކާ މިކަމުގެ މަޝްވަރާ ކުރެވެމުންދާ ކަމަށް މިނިސްޓަރ ވިދާޅުވެފައި ވެއެވެ. އެގޮތުން ފަސްދޮޅަހަކަށް ކައުންސިލަކުން މިހާތަނަށް މިކަމަށް ޝައުގުވެރިކަން ފާޅުކޮށްފައިވާ ކަމަށް މިނިސްޓަރ ހާމަކުރެއްވިއެވެ.
މިނިސްޓަރ ވިދާޅުވީ ހެލްތް މިިނިސްޓްރީގެ އިސްނެގުމުގެ ތެރެއިން އިސްރަށްވެހިންނަށް ހާއްސަ ކްލިނިކްތައްވެސް އަތޮޅުތެރޭގައި ހިންގަމުންދާ ކަމަށެވެ. އަދި ސްޕޯޓްސް މިނިސްޓްރީ އިން އަތޮޅުތަކުގައި އިސްރަށްވެހިންނަށް ބޭނުންވާ ކަސްރަތު ކަހަލަ ބައިތައް ކުރިއަށްގެންދާ ކަމަށް މިިނިސްޓަރ މައުލޫމާތު ދެއްވިއެވެ. އިސްރަށްވެހިންނާ ގުޅޭ ޚާއްޞަ ޕޮލިސީއަކާއި އެކްޝަން ޕްލޭނެއް އެކުލަވާލުމުގެ މަސައްކަތް ކުރަމުންދާ ކަންވެސް މިނިސްޓަރ ފާހަގަކުރެއްވިއެވެ.
ޝިހާމް އިތުރަށް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރާއްޖޭގެ ތިން ސަރަހައްދެއްގައި އިސްރަށްވެހިންގެ ނާދީ ގާއިމުކުރުމަށް ވައުދުވެވަޑައިގެންފައިވާ ކަމަށެވެ. އެގޮތުން، މާލޭގައި ގާއިމުކުރި އިސްރަށްވެހިންގެ ނާދީގެ މަސައްކަތް ކާމިޔާބުކަން މިނިސްޓަރ ފާހަގަކުރެއްވިއެވެ. މިއީ އިސްރަށްވެހިންގެ ދުޅަހެޔޮ ސިއްހަތަށް ރަނގަޅު މަސައްކަތެއްކަން މިނިސްޓަރ ފާހަގަކުރެއްވިއެވެ.
މީގެ ކުރިންވެސް މިނިސްޓަރ ވަނީ އައްޑޫ ސިޓީ ފޭދޫގައި އިސްރަށްވެހިން ބަހައްޓާނެ ތަނެއް މިހާރު ހެދުމަށްޓަކައި ޕަބްލިކް ޕްރައިވެޓް ޕާޓްނާޝިޕެއްގެ ތެރެއިން އިއުލާންކުރެވި ހޮވޭ ފަރާތަކާއި އެމަސައްކަތް ހަވާލުކުރާނެ ކަމަށެވެ. އެތަނުގައި ނަރުހުންގެ ހިދުމަތް ލިބޭނެ ގޮތް ފަހިކުރުމަށް މަސައްކަތްކުރަމުންދާ ކަމަށްވެސް މިނިސްޓަރ ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
