ދަރަންޏެއް ސާބިތުުވުމާއި ގުޅިގެން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރ މުޙައްމަދު ސިނާންގެ ގޮނޑިއާ މެދު ގޮތެއް ނިންމުމަށް ސުޕްރީމް ކޯޓަށް މައްސަލަ ވައްދައިފިއެވެ.
ހިތަދޫ މެޖިސްޓްރޭޓް ކޯޓުން މީގެ އަހަރެއް ކުރިން ވަނީ ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ މެންބަރު ކަމުގައިވާ ސިނާންއާއެކު އަހުމަދު ވަހީދާއި މުހައްމަދު ސަލީމް، މޯލްޑިވްސް އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް ނުދައްކާ ހުރި މައްސަލައެއް ބަލާފައެވެ.
މި ތިން މީހުންނާ ދެކޮޅަށް ހިތަދޫ މެޖިސްޓްރޭޓް ކޯޓުގައި ނިމިދިޔަ އަހަރުގެ 21 ޖުލައި ގައި އެމްއައިބީން ދައުވާ ކުރިއިރު، އޭގެ އެއަހަރުގެ އޮކްޓޯބަރު މަހުގެ 14 ވަނަ ދުވަހު އެ މައްސަލަ އެމްއައިބީ އިން ކާމިޔާބު ކޮށްފައިވެ އެވެ.
މި ތިން މީހުންނަށް ކޯޓުން ވަނީ ނުދެއްކި ހުރި ލޯނު ދެއްކުމާއި ޖޫރިމަނާގެ ފައިސާ 6 މަސް ދުވަހުގެ ތެރޭގައި އެމްއައިބީއަށް ދެއްކުމަށް ހުކުމް ކޮށްފައެވެ.
މިކަމާއި ގުޅިގެން ބުރާސްފަތި ދުވަހު އަމިއްލަ ފަރާތަކުން ވަނީ ކޯޓުން އަމުރުކުރި ގޮތަށް މި ތިން މީހުން ދަރަނި އަދާނުކުރާ ކަމަށް ބުނެ މައްސަލަ ހުށަހަޅާފައެވެ.
ގާނޫނު ބުނާ ގޮތުގައި މަޖިލީސް މެންބަރެއް އިންތިހާބުގެ ކުރިން ނުވަތަ މެންބަރުކަމަށް ވަޑައިގަތުމަށްފަހު ދަރަންޏެއް ނުދައްކާހުރިނަމަ އެ މެންބަރެއްގެ ގޮނޑި ގެއްލޭނެއެވެ. ނިމިދިޔަ އޭޕްރީލްގައި ބޭއްވި މަޖިލިސް އިންތިހާބުގައި އުތުރު ހިތަދޫ ގޮނޑި ސިނާން ކާމިޔާބު ކުރެއްވީ އެމްޑީޕީ ކެންޑިޑޭޓް މުހައްމަދު އަސްލަމްގެ މައްޗަށް ކުރި ހޯއްދަވައިގެންނެވެ.
Advertisement
This content is created and paid for by advertisers and does not involve Voice Journalists
