ގައުމީ ޑިޖިޓަލް އައިޑެންޓިޓީ ސާވިސް, އީފާސް ބޭނުންކޮށްގެން އޮންލައިން ޕޯޓަލް މެދުވެރިކޮށް ސިޔާސީ ޕާޓީގެ މެމްބަރުން ރަޖިސްޓްރީ ކުރާގޮތަށް އިލެކްޝަންސް ކޮމިޝަން (އީސީ) ގެ ގަވާއިދަށް ބަދަލު ގެނެސްފި އެވެ.
މިއީ ސިޔާސީ ޕާޓީގެ މެންބަރުން އިތުރުކުރުމަށް އޮޅުވާލައިގެން ޒާތީ މައުލޫމާތު ނަގައި ސިޔާސީޕާޓީތަކަށް މީހުން ވައްދަމުންދާ މިންވަރު އިތުރުވަމުންދާތީވެ، ގެނައި ބަދަލެކެވެ.
ސަރުކާރުގެ ގެޒެޓުގައި ޝާއިއުކޮށްފައިވާ އައު ގަވާއިދުގައިވާ ގޮތުން ސިޔާސީ ޕާޓީތަކުގެ މެމްބަޝިޕް ފޯމު ބަލައިގަންނާނީ ސިމެދާ ޕޯޓަލް މެދުވެރިކޮށެވެ. އަދި މެންބަރުކަމުގެ ފޯމެއް ހުށަހަޅާއިރު ސިޔާސީ ޕާޓީއަކަށް މީހަކު ރަޖިސްޓްރީ ކުރުމުގެ ކުރިން ޝަކުވާ ހުށަހެޅުމަށް އީސީން ހުޅުވާލަން ވެސް ލާޒިމްކޮށްފައިވެ އެވެ.
އަދި "ސިމެދަ" ޕޯޓަލް މެދުވެރިކޮށް ހުށަނޭޅޭ ހާލަތެއް މެދުވެރިވެެއްޖެނަމަ ސިޔާސީ ޕާޓީގައި ދަފްތަރުކުރުމަށް އިލެކްޝަންސް ކޮމިޝަނުން ގޮތެއް ކަނޑައަޅު އާންމުކުރަންވާނެ ކަމަށް ބުނެފައިވެއެވެ.
އެ ގަވައިދުގެ 18 ވަނަ މާއްދާ އަށް ގެނައި އިސްލާހުގައި ވަނީ ޕާޓީއަށް މެންބަރުން ވެއްދުމަށްޓަކައި ރަޖިސްޓްރީކޮށްގެން ހިންގާ ސިޔާސީ ޕާޓީތަކާއި ސިޔާސީ ޕާޓީއެއް އުފެއްދުމުގެ ހުއްދަ ދީފައިވާ ފަރާތްތަކަށް "ސިމެދަ" ޕޯޓަލް މެދުވެރިކޮށް ޕާޓީއަށް މީހުން ވެއްދުމުގެ ހުއްދަ އީސީއިން ދޭންވާނެ ކަމަށެވެ.
އެ ހުއްދަ ދެވޭނީ އެކަމަށް އެދި އީސީއަށް ހުށަހެޅުމުން ކަމަށް ވެސް އިސްލާހުގައި ވެއެވެ.
Advertisement
This content is created and paid for by advertisers and does not involve Voice Journalists
