ސަރުކާރުގެ ވުޒާރާތަކުން ކުރަމުން އަންނަ ކަންކަމާގުޅޭ މައުލޫމާތު ރައްޔިތުންނާ ހިއްސާކޮށް، ރައްޔިތުން ބޭނުންވާ ސުވާލުތަކަށް ޖަވާބުދިނުމުގެ ގޮތުން ވަޒީރުންނާއެކު ބާއްވާ "އަހާ" ގެ ފޯރަމް މިރޭ އޮންނާނެއެވެ.
ރައީސް އޮފީހުން ބުނީ "އަހާ"ގެ 4 ވަނަ ފޯރަމް މިރޭ 09:00 ޖަހާއިރު ބޭއްވުމަށް ހަމަޖެހިފައި ވެއެވެ. މިރޭގެ ފޯރަމްގައި ވެސް ސަރުކާރު ކެބިނެޓްގެ ފަސް ވަޒީރުންނާއި ސުވާލުކުރުމުގެ ފުރުސަތު ވަނީ ހުޅުވާލާފައި ވެއެވެ.
ރައީސް އޮފީހާއި ދައުލަތުގެ މީޑިއާ، ޕީއެސްއެމްއިން ގުޅިގެން ބާއްވާ މިރޭގެ ފޯރަމްގައި ބައިވެރިވެވަޑައިގަންނަވާނީ ސޯޝަލް މިނިސްޓަރު ޑރ. އައިޝަތު ޝިހާމް، ހަޔަރ އެޑިއުކޭޝަން މިނިސްޓަރު ޑރ. ޢަލީ ހައިދަރު އަޙުމަދު، އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދާއި އިކޮނޮމިކް މިނިސްޓަރު މުޙައްމަދު ސަޢީދު އަދި ޓޫރިޒަމް މިނިސްޓަރު ޠާރިޤު އިބްރާހިމެވެ.
މި ފޯރަމްގައި ބައިވެރިވެ ސުވާލު ކުރުމުގެ ފުރުސަތު އާއްމުކޮށް ހުޅުވާލާފައިވާއިރު ފޯނުން ގުޅައިގެންނާއި ސޯޝަލް މީޑިއާ މެދުވެރިކޮށް އަދި އެސްއެމްއެސް މެދުވެރިކޮށް ސުވާލު ކުރުމުގެ ފުރުސަތުވެސް މިހާރު ހުޅުވާލާފައިވާ ކަމަށް ޕީއެސްއެމްއިން ބުނެއެވެ.
އެގޮތުން އެސްއެމްއެސް މެދުވެރިކޮށް ސުވާލުކުރަން ބޭނުންނަމަ AH ޖެހުމަށްފަހު ހުސްތަންކޮޅެއް ދޫކުރުމަށްފަހު ކުރަން ބޭނުންވާ ސުވާލު ލިޔުމަށްފަހު 300 އަށް ފޮނުވަން އެދިފައިވެއެވެ.
އަހާ ފޯރަމަކީ ކޮންމެ ދެ މަހުން އެއްމަހު ވުޒާރާތަކުގެ ވަޒީރުން ހިމެނޭހެން ކުރިއަށްގެންދާ ފޯރަމެކެވެ.
Advertisement
This content is created and paid for by advertisers and does not involve Voice Journalists
