ސަރުކާރާ ދިވެހި ރައްޔިތުން ހިއްސާވާ ޓޫރިޒަމް ކުންފުނި، މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އަށް މިދިޔަ އަހަރު ސާފްފައިދާގެ ގޮތުގައި 1.3 މިލިއަން ޑޮލަރު ލިބިއްޖެއެވެ.

އެމްޓީޑީސީން ނެރެ އާއްމުކޮށްފައިވާ އެކުންފުނީގެ މިދިޔަ އަހަރުގެ މާލީބަޔާނަށް ބަލާއިރު، އެ އަހަރުގެ ތެރޭގައި ޓޫރިޒަމް ވިޔަފާރިން އެކުންފުންޏަށް ވަނީ 5.2 މިލިއަން ޑޮލަރު ލިބިފައެވެ. އެއީ ދިވެހި ރުފިޔާއިން ބަލާނަމަ، 80.01 މިލިއަން ރުފިޔާއެވެ. މާލީބަޔާނަށް ބަލާއިރު، އާއްމު ގޮތެއްގައި އެކުންފުންޏަށް ކޮންމެ ކުއާޓަރަކުވެސް އާމްދަނީގެ ގޮތުގައި ލިބިފައިވަނީ 1.3 މިލިއަން ޑޮލަރެވެ.

މިދިޔަ އަހަރު އެމްޓީޑީސީ ހިންގުމުގެ ފައިދާގެ ގޮތުގައި ލިބިފައިވަނީ 1.4 މިލިއަން ޑޮލަރެވެ. މިދިޔަ އަހަރުގެ ސާފްފައިދާގެ ގޮތުގައި އެމްޓީޑީސީއަށް 1.3 މިލިއަން ޑޮލަރު ލިބުނުއިރު، ޓެކްސްއަށް ކެނޑުމުގެ ކުރިން އެކުންފުނީގެ ފައިދާ ހުރީ 1.5 މިލިއަން ޑޮލަރުގައެވެ. އެމްޓީޑީސީގެ ވިޔަފާރީގެ ފައިދާއިން މިދިޔަ އަހަރު ހިއްސާއަކަށް ޖެހިފައިވާކަމަށް އެކުންފުނީގެ މާލީބަޔާނުން ދައްކަނީ 60 ލާރިއެވެ.

Advertisement

އެމްޓީޑީސީގެ މިދިޔަ ކުއާޓަރުގެ މާލީ ހިސާބުތަކާ ގުޅޭގޮތުން ނެރެފައިވާ ރިޕޯޓުން ދައްކާގޮތުގައި، ހދ.އަތޮޅު ރައްޔިތުންގެ އެންމެ އުއްމީދީ މަޝްރޫޢުކަމަށްވާ، ނާގޯށި ރިސޯތް ހެދުމުގެ މަސައްތް އަދިވެސް އޮތީ ހުއްޓިފައެވެ.

އެމްޓީޑީސީއަކީ ޓޫރިޒަމްގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށް 2006 ވަނަ އަހަރު ރައީސް މައުމޫން ވެރިކަމުގައި އުފެއްދި ކުންފުންޏެކެވެ.