ކުރިއަށް އޮތް ދެ އަހަރު ތެރޭޭ ފެނާއި ނަރުދަމާގެ މަސައްކަތް އެއްކޮށް ނިންމާލެވޭނެ ކަމަށް އެންވާރަމެންޓް މިނިސްޓަރ ޠާރިޤު އިބްރާހީމް ވިދާޅުވެއްޖެއެވެ.

މިނިސްޓަރ މިގޮތަށް ވިދާޅުވީ ޕީއެސްއެމްއާއި ރައީސް އޮފީހުން އިންތިޒާމްކުރި "އަހާ"ގެ 4 ވަނަ ފޯރަމްގައި ރޭ ވާހަކަދައްކަވަމުންނެވެ.

މި ފޯރަމްގައި ވާހަކަދައްކަވަމުން މިނިސްޓަރ ވިދާޅުވީ ފެނާއި ނަރުދަމާއާއި ގުޅުންހުރި ޕޮލިސީތައް ހެދުމަކީ އެންވާރަމެންޓް މިނިސްޓްރީގެ މަސައްކަތެއް ކަމަށެވެ. އެ މަސައްކަތްތައް ސީދާ ތަންފީޒުކުރަނީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން ކަން މިނިސްޓަރ ފާހަގަކުރެއްވިއެވެ.

Advertisement

މިނިސްޓަރ ވިދާޅުވީ އެ މަސައްކަތް 2 އަހަރު ތެރޭގައި އެއްކޮށް ހުރިހާ ރަށެއްގައި ފެނާއި ނަރުދަމާގެ މަސައްކަތްތައް ނިންމާލެވޭނެ ކަމަށެވެ. އެެހެންވީމަ ސަރުކާރުން އެ ވުޒާރާގެ ޕޮލިސީ ހަދާ ފަޅިއާއި ތަންފީޒުކުރުމާއި ބެހޭ ފަޅީގެ ކަންތައްތައް ރާއްޖޭގެ ހުރިހާ ރަށެއްގައި ކުރިއަށް އޮތް 2 އަހަރު ތެރޭ މިހާރު ކުރިއަށްދާ މަސައްކަތްތައް ނިންމާލާނެ ކަމަށް މިނިސްޓަރ ވިދާޅުވިއެވެ. 

ބައެއް ރަށްރަށުގައި ފެނާއި ނަރުދަމާއަކީ ކޮންމެހެންވެސް ކުރަންޖެހޭ ކަމެއްކަން މިނިސްޓަރ ފާހަގަކުރެއްވިއެވެ. އާބާދީ އިތުރުވާގޮތުންނާއި އާބާދީ އިތުރުވާ ސަރަހައްދުތަކުގައި އެކަންތައްތައް އިތުރަށް ފުޅާކުރަމުންދާނެ ކަމަށް މިނިސްޓަރ ވިދާޅުވިއެވެ. މިކަމަށް ބޭނުންވާ މައުލޫމާތާއި ޑިޒައިންތައް ހެދުމުގެ މަސައްކަތާއި ހަދަންޖެހޭ ގޮތްތަކާއި ގުޅޭ މަސައްކަތްތައް ކޮންސްޓްރަކްޝަން މިނިސްޓްރީއާއިއެކު ކުރަމުންދާނެ ކަމަށް މިނިސްޓަރ ވިދާޅުވިއެވެ.