ޙައްޖުގެ ނިޒާމު ހަރުދަނާކުރެއްވުމަށް ކުރައްވަމުންދާ މަސައްކަތުގެ ތެރެއިން، މިދައުރުގެ ތެރޭގައި ޙައްޖަށް ދިޔުމަށް ކުރާ ހޭދަ ކުޑަކުރެވޭނެކަމަށް އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ރޭ ވިދާޅުވެއްޖެއެވެ.
ރޭ ކުރިއަށް ދިޔަ "އަހާ ފޯރަމް"ގައި ވާހަކަފުޅުދައްކަވަމުން ވަޒީރު ޑރ.ޝަހީމް ވިދާޅުވީ، ހައްޖު ކޯޓާއާއި ބެހޭ މައްސަލައަކީ ހުރިހާ ގައުމުތަކުގެވެސް އޮތް ކަންބޮޑުވުމެއް ކަމަށެވެ. އަދި ރާއްޖޭގެ ހައްޖު ކިޔުގައި މިވަގުތުވެސް 9000 މީހުން ތިބި ކަމަށާ، އޭގެ ތެރެއިން އެއް ބަޔަކީ ކޮވިޑާއި ގުޅިގެން ހައްޖަށް ނުދެވުމުގެ ސަބަބުން އިތުރުވި މީހުން ކަމަށެވެ.
މިއާއެކު ވަޒީރު ވަނީ، ކިޔުގައި ތިބި ފަރާތްތަކުގެ ތެރެއިން އުމުރުން ދުވަސްވީ މީހުންނާއި ޚާއްސަ ހާލަތްތައް މެދުވެރުވެފައިވާ ފަރާތްތަކަށް އިސްކަން ދިނުމަށް މިހާރު ނިންމާފައިވާކަން ފާހަގަކުރައްވާފައެވެ.
ވަޒީރު އިތުރަށް ވިދާޅުވީ، ޙައްޖުގެ ނިޒާމު ހަރުދަނާކުރެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޚާއްސަ އިސްކަމެއް ދެއްވާކަމެއްކ ކަމަށްވާއިރު، އެމަނިކުފާނުގެ އިރުޝާދުފުޅާއެކު ޙައްޖަށް މީހުން ގެންދިޔުމުގެ އަގު ކުޑަކުރުމަށް ޙައްޖު ކޯޕަރޭޝަނުން މަސައްކަތް ކުރައްވަމުންދާކަމަށެވެ.
"ޙައްޖަށް މީހުންދިޔުމުގެ އަގު ކުޑަކުރުމަށް މޯލްޑިވްސް ޙައްޖު ކޯޕަރޭޝަނުން ތަސައްވުރެ ކަނޑައަޅުއްވައިގެން އޭގެ ދަށުން މަސައްކަތް އެބަކުރަމުންދޭ. މިއަދު މިވެނި ދުވަހެއްގައި ޙާސިލުވާނެޔޭ ދަންނަވަން ދަތި. އެހެންނަމަވެސް ރައީސް މުޢިއްޒުގެ މިދައުރުގެ ތެރޭގައި އިރާދަކުރެއްވިޔާ އެއަށް ހަރުދަނާ ހައްލެއް އަންނާނެ." ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
