އެފްޓީއޭ އާއިއެކު ޗައިނާ މުދާ ގެންނަ ކަމަށްވާނަމަ ޑިއުޓީ ފްރީވެގެންދާނެ ކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ މިގޮތަށް ވިދާޅުވީ ޕީއެސްއެމްއާއި ރައީސް އޮފީހުން ގުޅިގެން އިންތިޒާމްކުރި "އަހާ" ފޯރަމްގެ ތެރެއިން ރޭ ބޭއްވި 4 ވަނަ ފޯރަމްގައި ވާހަކަދައްކަވަމުންނެވެ. 

މި ފޯރަމްގައި ވާހަކަދައްކަވަމުން މިނިސްޓަރ ވިދާޅުވީ ގެސްޓްހައުސް އިމާރާތްކުރުމާއި ސަފާރީ ބަނުމަށް ވަރަށް ގިނަ ސާމާން ރާއްޖެއިން އިމްޕޯޓް ކުރާ ކަމަށެވެ. އެގޮތަށް އިމްޕޯޓް ކުރާއިރު ކޮންސްޓްރަކްޝަން ސާމާނާއި ފަރުނީޗަަރާއި މިހެންގޮސް ހުރިހާ ބާވަތްތައް މީގެ ކުރިން ޗައިނާއިން އިމްޕޯޓް ކުރާއިރު 5% އާއި 10% އާއި ދޭތެރޭގެ ރޭޓްބޭންޑްތަކެއް ޗާޖް ކުރާކަން މިނިސްޓަރ ފާހަގަކުރެއްވިއެވެ. އެ މުދަލުން އިތުރު ކޮސްޓެއްވެސް ނަގާކަން މިނިސްޓަރ ފާހަގަކުރެއްވިއެވެ. މި ހަރަދަކީ ގެސްޓްހައުސް އަޅާ ފަރާތްތަކަށް ބޮޑުވެގެންދާ ހަރަދެއް ކަމަށް މިނިސްޓަރ ވިދާޅުވެފައި ވެއެވެ. އޭގެ ބަދަލުގައި ޗައިނާއިއެކު ދިވެހި ސަރުކާރުން ހަދާފައިވާ ފްރީ ޓްރޭޑް އެއްބަސްވުމުގެ ދަށުން އެ އަދަދުތައް މިހާރު 0% އަށް ގެނެވިފައިވާ ކަމަށް މިނިސްޓަރ ހާމަކުރެއްވިއެވެ. 

Advertisement

މީގެ އިތުރަށްވެސް މިނިސްޓަރ ވިދާޅުވީ 296 ބާވަތުގެ ސީފުޑް 0% ރޭޓްގައި ޗައިނާއަށް އެކްސްޕޯޓް ކުރުމުގެ ފުރުސަތު ރާއްޖެއަށް ލިބިފައިވާ ކަމަށް މިނިސްޓަރ މައުލޫމާތު ދެއްވިއެވެ. އެފްޓީއޭ އިން ފަހިކޮށްދިން މި ފުރުސަތަކީ މިއީ އެއްވެސް ތަނަކަށް ލިބިފައިނުވާ ފުރުސަތެއްކަން މިނިސްޓަރ ފާހަގަކުރެއްވިއެވެ. އަދި މިކަމުގެ ސަބަބުން ބޭރު ގައުމުތަކުން މަހުގެ ބާވަތްތައް ގެނެސް ވެލިއު އެޑްކޮށް ޗައިނާއަށް ރީއެކްސްޕޯޓް ކުރުމުގެ ފުރުޞަތު ލިބިގެންދާނެ ކަމަށްވެސް ފާހަގަކުރެއްވިއެވެ.

ޓޫރިޒަމް ދާއިރާގައި ޗައިނާގެ އޭޖެންޓުންނަށް ރާއްޖޭގައި ހަރަކާތްތެރިވެވޭނެ ފުރުސަތު ނުލިބޭނެކަން މިނިސްޓަރު ފާހަގަކުރެއްވިއެވެ. އަދި މި އެއްބަސްވުމުގެ ދަށުން ޗައިނާއިން ރާއްޖެއަށް އެތެރެކުރާ މުދަލުގެ 91 އިންސައްތަ ބާވަތުން ޑިއުޓީ ދައްކަން ނުޖެހޭނެ ކަމަށްވެސް ސައީދު ވިދާޅުވިއެވެ.

 ޗައިނާއާއެކު ވެފައިވާ މިނިވަން ވިޔަފާރީގެ އެއްބަސްވުން (އެފްޓީއޭ) ފެށުމުން ދިވެހި ވިޔަފާރިތަކަށް ހިމާޔަތް ލިބޭނެކަމުގެ ޔަގީންކަން ދެއްވައިފައިވާއިރު، މި އެއްބަސްވުމަށް އަމަލުކުރުމަށް ސަރުކާރުން ނިންމާފައިވަނީ 2025 ވަނަ އަހަރުގެ ޖެނުއަރީ 1 ގައެވެ.