ރަމަޟާން މަހު ރައްޔިތުންގެ މަޖިލީހުގެ ދައުރު ކުރުކޮށް ޗުއްޓީއަށް ދާން މަޖިލީހުގެ އާންމު ކޮމިޓީން ފާސްކޮށް ނިންމި ނިންމުން ބަދަލުކޮށް، ޗުއްޓީއަށް ނުދާ ގޮތަށް މަޝްވަރާކޮށފައިވާ ކަމަށް ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު މިއަދު ވިދާޅުވެއްޖެއެވެ.

މި މަހު ހައެއްގައި ފެށި މި އަހަރުގެ ފުރަތަމަ ދައުރުގެ މަޖިލިސް، މި މަހުގެ ނިޔަލަށް ނިންމާލައި، ދައުރު ކުރު ކުރަން މާފަންނު ދެކުނު ދާއިރާގެ ޕީއެންސީ މެމްބަރު އަބްދުالله ރިފާއު (ބޮޗޭ) މިިދިޔަ ހަފުތާގައި ހުށަހެޅުއްވާފައިވާއިރު، އެ ނިންމުން ކޮމިޓީން ފާސްވެސް ވަނީ ކޮށްފައެވެ. 

ނަމަވެސް، އެކަމާ ގުޅިގެން ގިނަ ބައެެއްގެ ފާޑުކިޔުންތައް ޕީއެންސީ މެންބަރުންނަށާއި މަޖިލީހަށް އަމާޒުވެފައިވަނިކޮށް، މިއަދު ”ވޮއިސް“ އަށް މައުލޫމާތު ދެއްވަމުން ފަލާޙް ވިދާޅުވީ، ރޯދަމަހުގެ ފަހު ދިހައަކީ ބަންދު ދުވަސް ތަކެއް ކަމުގައި ރައީސުލްޖުމްހޫރިއްޔާ ކަނޑައެޅުއްވުމުން އެ ދުވަސްތައް މަޖިލީހަށްވެސް ބަންދުވާ ކަމަށެވެ. 

Advertisement

”އެހެންކަމުން 9 ދުވަހު މަޖިލީހުގެ މަސައްކަތް ކުރަން މިޖެހެނީ. ޖެހޭއިރު، މަޖިލީހުގެ ގަވާއިދު އޮންނަ ގޮތުން ރޯދަމަހު މަސައްކަތް ކުރަން މިޖެހެނީ ދެ ގަޑިިއިރު. އެހެންވެ އަޅުގަނޑުމެން ނިންމީ އެ ދުވަސްތައް ބަންދު ކޮށްފައި، އޭގެ ބަދަލުގައި މަޖިލީސް ބަންދު މަހެއްގައި، ފުލްކޮށް މަޖިލިސް ކުރިއަށް ގެންދަން އަޅުގަނޑުމެން ނިންމީ“ ފަލާހް ވިދާޅުވިއެވެ. 

ނަމަަވެސް އެ ނިންމުމާއެކު ރައްޔިތުންގެ ނުރުހުން އަމާޒުވެ، މަޖިލީހުން އިތުރު ޗުއްޓީއެއް ނަގައި، މަޖިލިސް އަބަދު ޗުއްޓީގައި އޮންނަ ފަދަ މޭރުމަކުން ފާޑުކިޔުންތައް އަމާޒުވުމުން، މިހާރު އަލުން ވިސްނަވަމުން ގެންދަނީ ކުރިން ވެސް އަމަލުކުރާ ގޮތަށް އަމަލުކުރުމަށް ކަމަށް ފަލާހު ވިދާޅުވިއެވެ.

"އަޅުގަނޑުމެންނަށްވެސް މާ ފަސޭހަ ރޯދަމަހު ނުވަ ދުވަހު ދުވާލަކު ދެގަޑިއިރު ކޮށްފައި، ފުލްކޮށް އަޅުގަނޑުމެން ޗުއްޓީ ނަގާ މަހެއްގައި ޗުއްޓީ ނެގުން،" ފަލާހު ވިދާޅުވިއެވެ.

ފަލާހު އިތުރަށް ވިދާޅުވީ މި ހިނގަމުންދާ 20 ވަނަ މަޖިލީހަކީ އެންމެ މަސައްކަތުގެ ރޭޓް އަވަސް މަޖިލިސް ކަމަށާ، މަޖިލިސް މެންބަރުންނަކީ އަބަދުވެސް ރައްޔިތުންގެ ޚިދުމަތުގައި ތިބޭ ބައެއް ކަމަށެވެ.