އެކްސްޕޯޓް އެޑިއުކޭޝަންގެ މަސައްކަތްތައް ކުރަން ސަރުކާރުން ނިންމާފައިވާ ކަމަށް ހަޔާ އެޑިއުކޭޝަން މިނިސްޓަރ ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

މިނިސްޓަރ މިގޮތަށް ވިދާޅުވީ ޕީއެސްއެމްއާއި ރައީސް އޮފީހުން އިންތިޒާމްކޮށްގެން ހޮނިހިރު ދުވަހުގެ ރޭ ބޭއްވި "އަހާ" ސިލްސިލާގެ ހަތަރުވަނަ ފޯރަމްގައި ވާހަކަދައްކަވަމުންނެވެ. 

މި ފޯރަމްގައި ވާހަކަދައްކަވަމުން މިނިސްޓަރ ވިދާޅުވީ މަތީ ތައުލީމު ދޭ އިންސްޓިޓިއުޓްތަކުން މުސްތަގުބަލުގެ ލީޑަރުންނަށް ވާން ތިބި ފަރާތްތައް ތަރައްގީކުރުމުގެ މަަަސައްކަތް ކުރަމުންދާ ކަމަށެވެ. އަދި ހުނަރުވެރި ޒުވާން ލީޑަރުން ތަރައްގީކުރުމަކީ މިނިސްޓްރީގެ މެންޑޭޓްގެ ތެރޭގައި ހިމެނޭ ކަމެއްކަންވެސް މިނިސްޓަރ ފާހަގަކުރެއްވިއެވެ.

އެއާއެކު، ރާއްޖޭގައި މަތީ ތައުލީމު ހާސިލު ކުރުމުގެ ފުރުސަތުތައް ބޭރުގެ ފަރާތްތަކަށް ދިނުމަށް އެކްސްޕޯޓް އެޑިއުކޭޝަންގެ މަސައްކަތްތައް ކުރުމަށް ސަރުކާރުން ނިންމާފައިވާ ކަމަށް ވަޒީރު ހާމަކުރެއްވިއެވެ.

އެކްސްޕޯޓް އެޑިއުކޭޝަންއާއި ބެހޭގޮތުން "ވޮއިސް" އަށް މައުލޫމާތު ދެއްވަމުން ހަޔާ އެޑިއުކޭޝަން މިނިސްޓްރީގެ ސީނިއާ ޕޮލިޓިކަލް ޑިރެކްޓަރ ޙުސައިން ޝާމް ވިދާޅުވީ އެކްސްޕޯޓް އެޑިއުކޭޝަންގެ ދަށުން ރާއްޖޭގައި ހުންނަ މަތީ ތައުލީމުދޭ ޔުނިވާސިޓީ އަދި ކޮލެޖްތަކުގައި ކިޔަވަން ބޭރުގެ ފަރާތްތަކަށް ހުޅުވާލުމަށް މިނިސްޓްރީ އިން ރާވާފައިވާ ކަމަށެވެ.

އެގޮތުން ސްޓޫޑެންޓް ވިސާއާއި ހުރުމާއި ޕޭސްޓަރަލް ކެއާ ފަދަ ވެލްފެއާ ހިދުމަތްތައް ހަމަޖައްސައިިގެން މި ދާއިރާ ކުރިއެރުވޭނެ ކަމަށް އޭނާ ވިދާޅުވިިއެވެ. 

ޕޭސްޓަރަލް ކެއާގެ ދަށުން ތައުލީމީ ވުޒާރާއަކުން ދަރިވަރުންގެ ޖިސްމާނީ އަދި ނަފްސާނީ ދުޅަހެޔޮކަން ކަށަވަރުކޮށްދިނުމަށް މަސައްކަތް ކުރާނެއެވެ. އެކި ތައުލީމީ މަރުކަޒުތަކުން ޕޭސްޓަރަލް ކެއާ ފޯރުކޮށްދޭނީ ތަފާތު އުސޫލުގެ މަތިންނެވެ.