ދަތުރުވެރިންގެ މާރުކޭޓްގައި ވިއްކާ ކާށީގެ އަގުތައް ވަރަށްބޮޑަށް މައްޗަށް ހިނގައްޖެއެވެ.
ދަތުރުވެރިންގެ މާރުކޭޓަށް ބަލާއިރު، އެތަނުގައި މިވަގުތު ހުރީ އަތޮޅުތެރޭގެ ރަށްތަކުން ވިއްކަން ގެނެސްފައިހުރި ކާއްޓެވެ. ކާށީގެ އަގުތައް ހުރިގޮތަށް ބަލާއިރު، އެންމެ އަގުހެޔޮކޮށްވެސް ކާއްޓެއް ލިބެންހުރީ 5 ރުފިޔާއަށެވެ. ނަމަވެސް އެއީ ވަރަށް ކުދި ކާއްޓެވެ. ދިވެހިން ކިޔާގޮތުންނަމަ ހުނިގޮނޑިތިލަވެސް ނުވަންނަވަރުގެ ކާއްޓެވެ.
ދަތުރުވެރިންގެ މާރުކޭޓްގައި އާދައިގެ ސައިޒުގެ ކާށި ލިބެންހުރީ 10 ރުފިޔާ އާއި 15 ރުފިޔާ އާ ދެމެދުގެ އަގުތަކެއްގައެވެ. ބޮޑެތި ކާށި މިއަދު ވިއްކަންހުރީ 30 ރުފިޔާއަށެވެ. ދަތުރުވެރިންގެ މާރުކޭޓުގައި މީގެކުރިން ދިވެހިކާށި ލިބުން ދަތިވުމުން ބައެއް ފަރާތްތަކުން އަވައްޓެރި އިންޑިއާއިން ކާށި ގެނެސް ވިއްކަމުންދިޔަ ނަމަވެސް މިހާރު އިންޑިއާ ކާށި ނުގެންނަތާ ދުވަސްކޮޅެއް ވެއްޖެއެވެ.
ފިހާރައެއްގައި ވިއްކަން ބަހައްޓާފައި ހުރި ކާށިތަކެއް... ފޮޓޯ: ވޮއިސް
ބާޒާރުގައި ކާށީގެ އަގު ބޮޑުވުމާއި ގުޅިގެން އެސްޓީއޯއިން އިއްޔެ ވަނީ ކާށި ގެނެސް ވިއްކަން ފަށާފައެވެ. އެސްޓީއޯއިން ގެނައި ކާށި ވިއްކަމުންދަނީ ކާއްޓެއް 5 ރުފިޔާއަށެވެ. އެސްޓީއޯއިން ރާއްޖެއަށް ކާށި އެތެރެކޮށް ވިއްކަން ފަށާފައިމިވަނީ ކުރިއަށްއޮތީ ރޯދަމަސްކަމުން އެމަހުގެ ތެރޭގައި ކާށީގެ އަގު އަތްނުފޯރާފަށަށް އަރައިގެން ހިނގައިދާނެތީއެވެ.
Advertisement
This content is created and paid for by advertisers and does not involve Voice Journalists
