އިންޑިއާ އާއި ފްރާންސް ގުޅިގެން މޮޑިއުލަރ ނިއުކްލިއަރ ރިއެކްޓަރތައް ހެދުމަށް އެއްބަސްވެފައިވާކަމަށް އިންޑިއާއިން ބުނެފިއެވެ.

އިންޑިއާއިން މިކަން އިއުލާނުކޮށްފައި ވަނީ ބޮޑުވަޒީރު ނަރެންދްރަ މޯދީ ފްރާންސަށް ކުރެއްވި ރަސްމީ ދަތުރުފުޅަށް ފަހުއެވެ. މި ދަތުރުފުޅުގައި މޯދީއާއި ފްރާންސްގެ ރައީސް އެމެނުއެލް މެކްރޮން ވަނީ އެނަރޖީ ސެކިއުރިޓީ ކަށަވަރުކުރުމަށް ނިއުކްލިއަރ ހަކަތައިގެ މުހިއްމުކަމުގެ މައްޗަށް ވާހަކަފުޅު ދައްކަވާފައެވެ. ފްރާންސްއާއެކު ނިއުކްލިއަރ ހަކަތައިގެ ވާހަކަތައް ބޭއްވުމުގެ ކުރިން، އިންޑިއާއިން ވަނީ އެގައުމުގެ ނިއުކްލިއަރ ހަކަތައާއި ބެހޭ ގާނޫނީ ނިޒާމުގައި އޮންނަ ހަރުކަށިކަން ކޮންމެވެސް ވަރަކަށް ދޫކޮށްލާފައެވެ. ގާނޫނަކާއި ގަވާއިދުތައް އޮންނަ ގޮތުން ޕްރައިވެޓް ސެކްޓަރަށް ނިއުކްލިއަރ ހަކަތައިގެ ދާއިރާގައި ހަރަކާތްތެރިވުމަށް ދަތިތަކެއް ހުރެއެވެ.

އިންޑިއާގެ އެކްސްޓަރނަލް އެފެއަރޒް މިނިސްޓްރީއިން ބުނީ ދެގައުމުން ގުޅިގެން އުފައްދާ ނިއުކްލިއަރ ރިއެކްޓަރ ތަކަކީ މަދަނީ ބޭނުންތަކަށް ބޭނުންކުރާނެ މޮޑިއުލަރ ރިއެކްޓަރކަމަށެވެ.

މޯދީ އެމެރިކާއަށް ކުރައްވާ ދަތުރުފުޅުގައިވެސް ނިއުކްލިއަރ ހަކަތައިގެ ދާއިރާއިން އިންޑިއާގައި އިންވެސްޓްކުރުމަށް އެމެރިކާގެ ކުންފުނިތަކާ މަޝްވަރާކުރެއްވުމަށްފަ ހަމަޖެހިފައިވެއެވެ. އަދި ރައީސް ޓްރަމްޕާއެކު ބާއްވާ މަޝްވަރާތަކުގައިވެސް ނިއުކްލިއަރ ހަކަތައިގެ ވާހަކަ ދައްކަވާނެކަމަށް އިންޑިއާގެ ތެލާއި ބެހޭ ވަޒީރު ހަރްދީޕް ޕޫރީ ވަނީ ކުރިން އިޝާރާތްކުރައްވާފައެވެ.