މިދިޔަ ޑިސެމްބަރުމަހުގެ 11 ވަނަ ދުވަހުގެ ރޭ ހުޅުމާލެ ނިރޮޅުމަގު އެމްޑަބްލިއުއެސްސީ ކައިރި މަގުގެ ސަރަހައްދު ބްލޮކްވާނޭހެން މުޒާހަރާކުރި ޓެކްސީ ޑްރައިވަރުންނަށް ދައުވާކުރުމަށް ހުށަހަޅައިފިއެވެ.
ޓެކްސީ ޑްރައިވަރުން ކުރި މުޒާހިރާގައި އެމީހުން ފުލުހުންގެ ބެލުމުގެ ދަށަށް ގެންދިޔައީ، ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް، އާންމު ދަތުރުފަތުރަށް ދަތިވާގޮތަށް ޢަމަލުތަކެއް ހިންގުމާ ގުޅިގެންކަމަށް ފުލުހުން ވަނީ ބުނެފައެވެ. މިކަމާ ގުޅޭގޮތުން ޕްރޮސެކިއުޓަރ ޖެނެރަލް، ޕީޖީ އޮފީހުން ބުނީ ޓެކްސީ ޑްރައިވަރުންގެ މުޒާހަރާއާ ގުޅިގެން 3 މީހެއްގެ މައްޗަށް ދައުވާކުރުމަށް ހުޅުމާލޭ މެޖިސްޓްރޭޓް ކޯޓަށް ހުށަހަޅާފައިވާކަމަށެވެ.
އާންމު ދަތުރުފަތުރަށް ހުރަސް އަޅައި ހުޅުމާލޭގެ މަގުތައް ބްލޮކް ކޮށްފައިވާ މައްސަލައާ ގުޅިގެން އެ ރޭ ތިން މީހަކު ފުލުހުންގެ ބެލުމުގެ ދަށަށް ގެނެސް، ހަތަރު ފުރޮޅުލީ 22 އުޅަނދު ވަނީ ޓޯކޮށްފައެވެ.އެ މުޒާހަރާއާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވަނީ، މއ. ވިރާހު، މުޙައްމަދު ޝާމިން، އާއި ލ.ދަނބިދޫ އަޙްމަދު ޝަބީންގެ އިތުރުން ހދ.ކުމުންދޫ ހޮލިޑޭވިލެޖް މުހައްމަދު ޝާމިންއެވެ.
މި ތިންމީހުންގެ މައްޗަށްވެސް ކުރާ ދައުވާއަކީ ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ދައުވާއެވެ. މި ދައުވާ ސާބިތުވެއްޖެނަމަ އެމީހުނަށް ޖަލުގައި 24 ދުވަހު ތިބެންޖެހޭނެއެވެ.
ޓެކްސީ ޑްރައިވަރުންގެ މުޒާހިރާގައި ހައްޔަރުކުރި ޑްރައިވަރުންނަށް ދައުވާކުރުމަށް ނިންމިއިރު، އިދިކޮޅު އެމްޑީޕީން ބުނެފައިވަނީ އެމީހުނަށް ޤާނޫނީ އެހީތެރިކަން ދޭނޭކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
