ފަތުރުވެރިއަކަށް ރާއްޖެ ކަނޑުން ލިބުނު މިޔަރު ހަމަލާއެއްގެ ވާހަކަ ބޭރުގެ މީޑިއާތަކާއި ހަމައަށް ގޮސްފިއެވެ.
ބޭރުގެ މީޑިއާއެއް ކަމުގައިވާ "ޔުނިލެޑް" އިން މީގެ ދެ ދުވަސް ކުރިން ރިޕޯޓްކުރި ގޮތުގައި މި ހާދިސާ ހިނގާފައިވަނީ ރަޝިޔާގެ ދެ ފަތުރުވެރިންނެއް ރާއްޖޭގައި ޗުއްޓީ ހޭދަކުރަމުންދަނިކޮށެވެ. މި ހާދިސާގައި އަނިޔާ ލިބިފައިވަނީ ރަޝިޔާގެ އިންފެލޫއެންސާއެއް ކަމުގައިވާ ނަސްޓްޔާ ވިޓޮނޯވާއަށެވެ. ވިޓޮނޯވާ ރީލްއެއް ތައްޔާރުކުރަން އިނީ މިޔަރުތައް ތިބި ސަރަހައްދެއްގައެވެ. ކުއްލިއަކަށް އޭނާގެ އަތުގައި މިޔަރެއް ދަތްއަޅާތަން ވީޑިއޯ އިން ދައްކައެވެ.
އެމީހުންނާއި އެއްކޮށް ދަތުރުކުރަމުންދިޔަ ޓުއާ ގައިޑް އޭގެ ފަހުން މި ދެ ފަތުރުވެރިން ކައިރި ހޮސްޕިޓަލަކަށް ގެންގޮސްފައި ވެއެވެ. އެ ވީޑިއޯގައި ވިޓޮނޯވާ އިނީ ރޯށެވެ. އަދި އޭނާގެ ލޭ ވިހަވެދާނެ ކަމުގެ ކަންބޮޑުވުން ފާޅުކޮށްފައި ވެއެވެ.
އޭނާ ހޮސްޕިޓަލަށް ގެންދިއުމަށްފަހު ލޭ މަނާވެފައި ވެއެވެ.
އެ ނޫހުން ވަނީ ރަޝިޔާގެ އިތުރު ފަތުރުވެރިއަކަށް ދިމާވި މިފަދަ ހާދިސާއެއްވެސް ރިޕޯޓްކޮށްފައެވެ. އެލީނާ ބޮއިކޯ ނަމަކަށް ކިޔާ އުމުރުން 44 އަހަރުގެ ފަތުރުވެރިއެއް އެ ނޫހަށް މައުލޫމާތުދިން ގޮތުގައި އޭނާ ރާއްޖޭގައި ޗުއްޓީ ހޭދަކުރަމުންދަނިކޮށް އޭނާގެ ޓުއާ ގައިޑް "ސްވިމް ވިތް ޝާކްސް" ނަމުގެ ދަތުރަކަށް އޭނާ ގެންގޮސްފައި ވެއެވެ. މި ދަތުރުގައި އެލީނާގެ ޓުއާ ގައިޑް، މިޔަރުތައް ތިބި ސަރަހައްދަކަށް އޭނާ ގެންދަންވެގެން ޕްރެޝާ ކުރި ކަމަށް އެލީނާ ކިޔާދީފައި ވެެއެވެ. އެފަހަރު އޭނާގެ އަތުގައި މިޔަރުގެ ބާވަތެއް ކަމުގައިވާ ނާސް ޝާކެއް ދަތްއަޅާފައިވާ ކަމަށް އެލީނާ ކިޔާދިނެވެ.
ފަހަކަށް އައިސް މިޔަރު ހަަމަލާ ދިނުމުގެ ހާދިސާތައް ވަނީ އިތުރުވެފައެވެ. ފީނަންދާ ފަރާތްތަކާއި މަސްވެރިންނަށް އަމާޒުވާ މިޔަރު ހަމަލާތައް ގިނަވަމުންދާއިރު މިޔަރަކީ އަދިވެސް ރާއްޖޭގައި ހިމާޔަތްކުރެވިފައިވާ މަހެކެވެ.
Advertisement
This content is created and paid for by advertisers and does not involve Voice Journalists
