ސްރީ ލަންކާގެ ގޭންގް ލީޑަރެއް ކަމަށް ތަހުމަތު ކުރެވޭ ގަނެމުއްލާ ސަންޖީވާ، ކޮލަމްބޯ ހަލްފްޓްސްޑޯޕް ކޯޓް ކޮމްޕްލެކްސް ތެރެއަށް ވަންނަން އުޅެނިކޮށް އޭނާ މަރާލައިފިއެވެ. 

ދަ ޓެލެގްރާފް އިން ރިޕޯޓްކުރި ގޮތުގައި ސަންޖީވާ މަރާލާފައިވަނީ ވަކީލެއް ކަމަށް ހެދިގެން އައި މީހެކެވެ. ސަންޖީވާ މަރުވެފައިވަނީ ބަޑީގެ ހަަމަލާއެއް އަމާޒުވެގެންނެވެ. އިއްޔެ އޭނާ މަރާލާފައިވަނީ ކަފާލާތުގެ އަޑުއެހުމެއްގައި ބައިވެރިވާން އުޅެނިކޮށެވެ. 

ސަންޖީވާ ކޯޓަށް ގެނައީ ބޮޑެތި ހަތިޔާރު އެޅި ގާޑުން ހިމެނޭ ސްޕެޝަލް ޓާސްކް ފޯސްގެ ކޮމާންޑޯތަކުންނެވެ. 

ސްރީ ލަންކާ ފުލުހުންގެ އިސް ސުޕްރިންޓެންޑެންޓް ބުޑިކާ މަނަތުންގާ ބުނީ ބަޑިޖެހި މީހާ ފިލުމުގެ ކުރިން ވަކީލެއް ކަމަށް ހެދިގެން ކޯޓު ޗެމްބަރުގެ ތެރޭގައި ބަޑިޖަހާފައިވާ ކަމަށެވެ. މިހަމަލާގައި ބޭނުންކުރި ރިވޮލްވަރު ވަނީ ކޯޓު ތެރޭގައި ބާއްވާފައެވެ. އެއާއެކު، މިހާރު ފުލުހުން ދަނީ މި ހާދިސާ ތަހުގީގުކޮށް ބަޑިޖެހި ފަރާތް ހޯދުމުގެ މަސައްކަތް ކުރަމުންނެވެ. 

ސަންޖީވާއަށް ލިބުނު ސީރިއަސް އަނިޔާއަށް ފަރުވާ ދޭން ހޮސްޕިޓަލަށް ގެންދިޔަފަހުން ހޮސްޕިޓަލުން ވަނީ އޭނާގެ މަރު ސާބިތުކޮށްފައެވެ.

ފުލުހުން ބުނީ ސަންޖީވާއަކީ ވަރަށް ބައިވަރު ކުށްތަކުގެ ދައުވާ އުފުލޭ ކުށްވެރިއެއް ކަމަށެވެ. އަދި ތަކުރާރުކޮށް އެތައް ފަހަރެއް މަތިން އޭނާ ފުލުހުންނަށް ފިލަން މަސައްކަތްކޮށްފައިވާ ކަމަށް ބުނެފައި ވެއެވެ. ސެޕްޓެމްބަރު 13، 2023 ގައި ސަންޖީވާ ހައްޔަރުކޮށްފައިވަނީ ނޭޕާލުން އެނބުރި އައިސް ކަޓޫނާޔަކޭގެ ބަންޑާރަނައިކޭ އިންޓަނޭޝަނަލް އެއާޕޯޓުންނެވެ. އޭނާ ހައްޔަރުކުރި އިރު ހުރީ ވަގު ޕާސްޕޯޓެއް ހިފައިގެން ކަމަށް ތުހުމަތު ކުރެވެ އެވެ.

އޮފިޝަލުން ދެކޭ ގޮތުގައި ސަންޖީވާ ހައްޔަރު ކުރުމަށް އިންޓަޕޯލްގެ ރެޑް ނޯޓިސް ނެރުމަށް ފަހު އެނބުރި ލަންކާއަށް އައުމުގެ ކުރިން ދޯންޏަކުން އިންޑިއާއަށް ވަދެ، ފަހުން ނޭޕާލަށް ފިލައިގެން ގޮސްފައިވެ އެވެ.

ސަންޖީވާ މަރާލާފައިވަނީ ލަންކާގައި ގޭންގް ކުށްތައް ގިނަވަމުންދާ ދަނޑިވަޅެއްގައެވެ. ގޭންގް ކުށްތަކުގެ ތެރެއިން މިއަހަރު އެކަނިވެސް 9 ލަންކާ މީހުން މަރުވެފައިވާ ކަމަށް އެގައުމުގެ ފުލުހުން ނެރުނު ތަފާސް ހިސާބުތަކުން ދައްކައެވެ. ކަން މިހެން އޮތް ހިނދު، ކޯޓެއްގެ ތެރޭގައި މީހަކު މަރާލާފައިވާތީ، ލަންކާ އާންމުން ދަނީ ސްރީ ލަންކާގެ ދާހިލީ ސެކިއުރިޓީއާއި ދޭތެރޭ ސުވާލު އުފައްދަމުންނެވެ.