ޗީފް ޖުޑީޝަލް އެޑްމިނިސްޓްރޭޓާގެ މަގާމަށް ކުރީގެ އިލެކްޝަންސް ކޮމިޝަން މެންބަރ އަމްޖަދު މުސްޠަފާ އައްޔަންކުރައްވައިފިއެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން ކުރި އިއުލާނެއްގެ ތެރެއިން އެ މަޤާމަށް ބޭފުޅަކު ހަމަޖެއްސުމަށް އެކުލަވާލެވުނު އިންޓަރވިއު ޕެނަލްއިން ކޮމިޝަނަށް ހުށަހަޅާފައިވާ ރިޕޯޓުގައިވާ ގޮތުގެމަތީން މި މަޤާމަށް ކުރިމަތިލައްވާފައިވާ ފަރާތްތަކުގެ ތެރެއިން ޝަރުތު ހަމަވެ، އިންޓަރވިއުއިން އެންމެ މަތިން މާކްސް ހޯއްދަވާފައިވަނީ މ.ރަންދޫވިލާ، އަލްއުސްތާޛު އަމްޖަދު މުޞްޠަފާ ކަމަށް ބުނެފައި ވެއެވެ.
ޗީފް ޖުޑީޝަލް އެޑްމިނިސްޓްރޭޓާގެ މަގާމަށް އިއުލާންކުރީ އެންމެ ފަހުން އެ މަގާމް އަދާކުރެއްވި ޢާއިޝަތު ރިޒުނާ، މިދިޔަ އަހަރުގެ ސެޕްޓެމްބަރ މަހުގައި އެ މަގާމުން އިސްތިއުފާ ދެއްވުމާއި ގުޅިގެންނެވެ.
އަމްޖަދު މުސްތަފާ އަކީ އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ޝަރީއަތާއި ގާނޫނީ ދާއިރާއިން ބެޗްލަރސް ޑިގްރީ ހާސިލް ކުރައްވާފައިވާ އަދި އިނގިރޭސިވިލާތުގެ އެންގްލިއާ ރަސްކިން ޔުނިވާސިޓީން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ޑިގްރީ ހާސިލް ކުރައްވާފައިވާ ބޭފުޅެކެވެ.
އަމްޖަދު މީގެ ކުރިން ވަނީ ކުރީގެ ރައީސް އިބްރާހީމް މުޙައްމަދު ޞާލިޙުގެ ދައުރުގައި އެމްޕްލޯއިމެންޓް ޓްރައިބިއުނަލްގެ ރައީސްކަންވެސް ކުރަައްވާފައެވެ. އަދި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ ބޯޑު ޑިރެކްޓަރުގެ މަގާމުވެސް އަދާކުރައްވާފައި ވެއެވެ.
Advertisement
This content is created and paid for by advertisers and does not involve Voice Journalists
