މަޖިލީހުގެ ރައީސް ޢަބްދުއްރަޙީމް ޢަބްދުالله، ރައީސް ޑރ. މުޙައްމަދު މުޢިއްޒުއާއި ރަސްމީކޮށް ބައްދަލުކުރައްވަން ރައީސް އޮފީހަށް ވަޑައިގެންފިއެވެ.

މަޖިލީސް ރައީސްގެ ކާރުކޮޅުގައި މިއަދު ހެނދުގެ ވަގުތެއްގައި ރައީސް އޮފީހަށް ވަނީ ވަޑައިގެންފައެވެ. ނަމަވެސް މި ބައްދަލުކުރެއްވުމަކީ ކޮން ބޭނުމެއްގައި ބާއްވާ ބައްދަލުވުމެއްކަން މަޖިލީހުން އަދި ރައީސް އޮފީހުން އަދި ހާމަކޮށްފައި ނުވެއެވެ.

މަޖިލީސް ރައީސް، ރައީސް މުޢިއްޒާއި ރަސްމީކޮށް ބައްދަލުކުރައްވަނީ ދެބޭފުޅުންގެ ގުޅުން ހީނަރުވެފައިވާ ކަމަށް ވާހަކަ ދެކެވެމުންދާ ދަނޑިވަޅެއްގައެވެ. ނިމިދިޔަ ޖެނުވަރީ މަހުގެ 28 ވަނަ ދުވަހު، މަޖިލީސް ރައީސްގެ ދަރިކަލުން ފައިސަލް އިބްރާހީމް، ޓޫރިޒަމް މިނިސްޓަރުކަމުގެ މަގާމުން ވަކިކުރެއްވުމަށްފަހު މި ވާހަކަ ފެތުރިފައި ވެއެވެ. މިއީ އޭގެ ފަހުން މަޖިލީހުގެ ރައީސްއާއި ރައީސް މުޢިއްޒު ރަސްމީކޮށް ބައްދަލުކުރައްވާ ފުރަތަމަ ފަހަރެވެ. 

Advertisement

އެކަމާއި ގުޅިގެން މަޖިލީސް ރައީސް މީޑިއާއަކަށް ދެއްވި ހާއްސަ އިންޓަވިއުއެއްގައި ވަނީ ރައީސްއާއި ދެބޭފުޅުންގެ ގުޅުން ރަނގަޅުނަމަ އެމަނިކުފާނުގެ ދަރިކަލުން މަގާމުން ވަކިނުކުރައްވާނެ ކަމަށް ވިދާޅުވެފައެވެ. ފައިސަލް މަގާމުން ވަކިކުރެއްވި ސަބަބެއް ސަރުކާރުން ހާމަކޮށްފައިނުވާކަންވެސް ފާހަގަކޮށްލަންޖެހެއެެވެ.