މިދިޔަ އަހަރުގެ ފިތުރު އީދަށް ލައިޓް ނުލިބޭ 36 ރަށަކަށް މި އަހަރު ލައިޓް ހޯދުމުގެ މަސައްކަތް ކުރަމުން އަންނަ ކަމަށާއި އެކަމަށް 28 މިލިއަނެއްހާ ރުފިޔާ ހަރަދުވާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެ އެވެ.
ސިޓީތަކާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު އާދަމް ޝަރީފް ވިދާޅުވީ، މިއަހަރުވެސް ޢީދު ލައިޓް ދިއްލުމަށް ބޭނުންވާ ވަސީލަތްތައް ރަށް ރަށަށް ފޯރުކޮށްދެއްވުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ނިންމަވާފައިވާ ކަމަށެވެ.
އެހެންކަމުން، އެކަމާއި ގުޅިގެން ސްޓެލްކޯއާއި ފިނޭންސް މިނިސްޓްރީއާވެސް މަޝްވަރާ ކުރައްވައި، އެ ކަމަށް ބޭނުންވާ ވަސީލަތްތައް ހޯދުމުގެ މަސައްކަތް ފަށްޓަވާފައިވާ ކަމަށް ވަޒީރު ވިދާަޅުވިއެވެ.
މިދިޔަ އަހަރު އަޅުގަނޑުމެންނަށް ޢީދު ލައިޓް ފޮނުވުނީ އަތޮޅު ތަކުގެ އަތޮޅު ވެރިކަންކުރާ ރަށްތަކަށް. އޭގެ އިތުރުން، މިއަހަރު އަޅުގަނޑުމެން ކޮންމެ އަތޮޅެއްގެވެސް ދެ ރަށަކަށް އެބަ ޢީދު ލައިޓް ފޮނުވަން. އެހެންވީމާ ޖުމްލަ، 36 ރަށަކަށް އަޅުގަނޑުމެން އެބަ ޢީދު ލައިޓް ހަދިޔާކުރަން.
އާދަމް ޝަރީފް ޢުމަރު
ސިޓީ ތަކާއި ބެހޭ ވުޒާރާއިން މައުލޫމާތު ދޭ ގޮތުގައި، ލައިޓްދޭ ރަށްތައް ކަނޑައަޅާފައިވަނީ ރަށްތަކުގެ އާބާދީއަށް ބަލާފައެވެ.
ޢީދު ލައިޓް ފޮނުވާ ރަށްތައް
މީގެ އިތުރުން، ޢީދު ލައިޓްތަކަށް ޚަރަދުވާނެ ފައިސާއާ ގުޅޭގޮތުން، ނޫސްވެރިއަކު ސުވާލުކުރުމުން އާދަމް ޝަރީފް ވިދާޅުވީ އެކަމަށް 28 މިލިއަނެއްހާ ރުފިޔާ ޚަރަދުވާނެ ކަމަށެވެ. އަދި އެހާ ފައިސާ ޚަރަދުވާ ނަމަވެސް އެކަމަކީ ކުރަން ރަނގަޅު ކަމެއް ކަމަށެވެ.
"ލައިޓުތަކަކީ ވެސް ކުރިއަށް އޮތް ތަނުގައި ބޭނުންކުރެވޭނެ އެއްޗެހި. މާލެއަކަށް ނުގެންނަން. ކުރިން ގެނައި ރަށްރަށަށް ނުގެންނަން. އެހެންވީމަ މިއަހަރު 36 ރަށަށް ހޭދަވާނެ ކަމަށް އެންމެ ގިނަވެގެން ވެސް ހޭދަވާނެ ކަމަށް ބެލެވެނީ 28 މިލިއަން،"
ވަޒީރު އާދަމް ޝަރީފް ޢުމަރު
ވަޒީރު އިތުރަށް ވިދާޅުވީ، ރާއްޖެއަށް ގެންނަ އީދު ލައިޓުތަކަކީ އިސްލާމީ ޝިއާރު ފާޅުކުރުމާއި ތަކުބީރު އިވުން ކަހަލަ ކަންކަން ވެސް ހިމެނޭ ލައިޓުތަކެއް ކަމުން، އެކަމަކީ އިސްލާމީ ވަހުދަތު ރައްކާތެރިކުރުމަށް ރައީސް ދެއްވާ އިސްކަން ހާމަވާ ކަމެއް ކަމަށެވެ.
"އަޅުގަނޑުމެން މި ގެންނަ އީދު ލައިޓުތަކަކީ ދެ ކަމަކަށް ފޯކަސްކުރާ ލައިޓުތަކެއް. އެއްކަމަކީ ވަރަށް ބޮޑަށް އިސްލާމީ ޝިއާރު ފާޅުކުރުމާއި ތަކުބީރު އިވުމާއި އަޅުގަނޑުމެންގެ އިސްލާމީ ވަހުދަތު ރައްކާތެރިކުރުމަށް ރައީސް ދެއްވާ އިސްކަމާއި އަހަމިއްޔަތުކަން އަދި ދިވެހިންގެ ތެރޭގައި އެ ލޯތްބާއި އިހުތިމާރު އޮތް ކަން ފާހަގަވާ ކަމެއް،" މިނިސްޓަރު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
