އެމްޑީޕީގެ ރައީސް ޢަބްދުﷲ ޝާހިދު، މެލޭޝިޔާގެ ޔުނިވާސިޓީ، ޔުނިޓަރ ގައި ސެޝަނެއް ނަންގަވައިދެއްވައިފިއެވެ.

ކުރީގެ ފޮރިން މިނިސްޓަރުކަން ކުރައްވާފައިވާ ޝާހިދު މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ. 

ޝާހިދު ސެޝަން ނަންގަވާދެއްވާފައިވަނީ ހާރިޖީ ދާއިރާއިން ތައުލީމު ހާސިލުކުރަމުންދާ ދަރިވަރުންނަށެވެ. އޭނާ ސެޝަން ނަންގަވާދެއްވާފައިވަނީ "ދަ އާޓް އޮފް ސްޕީޗްރައިޓިން" މި މައުޟޫއުއަށެވެ. މި ސެޝަނުގައި  ޝާހިދު ވަނީ ހާރިޖީ ދާއިރާގައި ހިދުމަތްކުރެއްވިއިރު، ކުރެއްވުނު ތަޖުރިބާތަކާއި، ޔޫއެންޖީއޭގެ ރައީސްގެ މަގާމުގައި ހުންނެވިއިރުގެ ތަޖުރިބާތައް ހިއްސާކުރައްވާފައެވެ.

Advertisement

މީގެ އިތުރުން ޝާހިދު ވަނީ ހާރިޖީ ދާއިރާއަށް އަންނަމުންދާ ކުރިއެރުންތަކާއި ދުނިޔޭގެ އެއްބާރުލުން ބައްޓަންކުރުމުގައި މަޝްވަރާގެ މުހިންމުކަމުގެ މައްޗަށް އަލިއަޅުވާލައްވައި ވާހަކަފުޅު ދައްކަވާފައެވެ.

ރާއްޖޭގެ ސިޔާސީ ލީޑަރުންގެ ތެރެއިން ޢަބްދުﷲ ޝާހިދަކީ ހާރިޖީ ކަންކަމުގައި ރާއްޖޭގައި ހުންނެވި އެންމެ ތަޖުރިބާކާރު އެއް ބޭފުޅާއެވެ.  ޢަބްދުﷲ ޝާހިދު ވަނީ އދގެ އާންމު މަޖިލީހުގެ ރައީސްކަމުގެ މަޤާމުވެސް ފުރުއްވާފައެވެ. އދގެ އާންމު މަޖިލީހުގެ 76 ސެޝަންގެ ރިޔާސަތު ޢަބްދުﷲ ޝާހިދު ބެލެހެއްޓެވިއިރު، މިއީ ދިވެއްސަކު އެ މަޤާމު ބެލެހެއްޓި ހަމައެކަނި ފަހަރެވެ.