‏މާލޭގެ އެކި ހިސާބުތަކުން ބަލިވެފައިވާ ކޮތަރާއި، މަރުވެފައިވާ ކޮތަރުތައް  ފެންނަމުންދާތީ އެކަން ދިމާވާ ސަބަބު ދެނެގަތުމުގެ މަސައްކަތް އެނިމަލް މިނިސްޓްރީން ފަށައިފި އެވެ.

ޖަނަވާރާބެހޭ މިނިސްޓްރީން ބުނީ މާލޭގެ އެކި ހިސާބުތަކުން ބަލިވެފައިވާ ކޮތަރާއި، މަރުވެފައިވާ ކޮތަރުތައް ފެންނަމުންދާކަން އެ މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އެކަން ދިމާވާ ސަބަބު ދެނެގަތުމުގެ މަސައްކަތް ފަށާފައިވާ ކަމަށް ވެސް ބުންޏެވެ. އަދި ސަބަބު ދެނެގަނެވޭހާ އަވަހަކަށް، އެކަމުގެ ތަފްސީލް އާންމު ކުރާނެ ކަމަށް ވަނީ ބުނެފަ އެވެ.

އެ މިނިސްޓްރީގެ ކަމާބެހޭ މުވައްޒިފުން ނިކުމެ ވަނީ އެފަދަ ކޮތަރުތަކުން ސާމްޕަލް ނަގާފަ އެވެ. ކޮތަރުތަކަށް ބަލި ޖެހި އެސޮރޮމެންގެ ލޯ ކައިރި ވަރަށް ބޮޑަށް ހަލާކުވެ އެވެ. އަދި ތުންގަނޑު ކައިރީ ވެސް ހަލާކުވެ އެވެ. ހުންނަނީ ފާރުވެފައި ހުންނަ ކަހަލަ ގޮތަކަށެވެ.

Advertisement

މީގެ ކުރިން 2022 ވަނަ އަހަރު ޖުމްހޫރީ މައިދާނުގައި ކޮތަރުތަކަށް ގޮތްނޭނގޭ ބައްޔެއްޖެހި ކޮތަރުތައް ބަލިވިއިރު، އެފަހަރު ކޮތަރުތަކުގެ ލޯ ކައިރީގެ އިތުރުން ތުންގަނޑުކައިރީ ވަނީ އުންތަކެއް ފާޑުގެ އެއްޗެއް ނަގާފައެވެ. ޖުމްހޫރީ މައިދާނުގައި އުޅޭ ކޮތަރުތަކަށް ކޮންމެ ދުވަހަކުވެސް އާއްމުން ކާންދެއެވެ.