ޓިކްޓޮކްގައި ވީޑިއޯ ހަދައި މީހުންގެ މަގުބޫލުކަން ހޯދާފައިވާ ބަދީޢުއަށް ރޯޑް ޑިވޮލަޕްމަންޓް ކޯޕަރޭޝަން (އާރުޑީސީން) ވަޒީފާ ހަމަޖައްސައިދީފިއެވެ. ބަދީޢުއަށް އާރްޑީސީން ވަޒީފާ ހަމަޖައްސައިދީފައިވަނީ އިއްޔެއެވެ.

ޓިކްޓޮކްގައި އެކި ވީޑިއޯތައް އާއްމު ކުރާ ބަދީޢު އަކީ ނުކުޅެދުންތެރިކަން ހުންނަ މީހެކެވެ. އޭނާގެ ވީޑިއޯތައް މީސް މީޑިއާގެ އެކި މަންސަތަކުގައި އާއްމުކޮށް ބައެއް ފަރާތްތަކުން އޭނާއަށް މަލާމާތާއި ފުރައްސާރަ ކުރާއިރު، އޭނާއަށް ހަޖޫ ޖެހުމުގެ ގޮތުންވެސް އެކި ވީޑިއޯތައް ހަދާފައި ހުންނަކަން ފާހަގަކޮށްލެވެއެވެ. 

ބަދީޢު ފަދަ، ނުކުޅެދުންތެރިކަން ހުންނަ އެހެން ފަރާތްތަކަށްވެސް ވަޒީފާ އިތުރުކޮށްދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.

Advertisement

އެގޮތުން، އެމީހުންނަށް ފަސޭހަ މަސައްކަތުގެ މާހައުލެއް ގާއިމްކޮށްދީ، އެމީހުންގެ ބޭނުން މުޖުތަމައުއަށް ހިފޭނެ ގޮތެއް ހައްދަވައިދެއްވާނެ ކަމަށް ރައީސް ކުރިން ވިދާޅުވެފައިވެ އެވެ.

އަދި ނުކުޅެދުންތެރިކަން ހުންނަ މީހުންނަށް ވަޒީފާ އިތުރު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، އެކަމާ ގުޅޭ ގަވާއިދެއްވެސް މިހާރު ވަނީ އާއްމުކޮށްފަ އެވެ.