ސަތާރަ ވަނަ ރައްޔިތުންގެ މަޖިލީހުގައި ހިތަދޫ މެދު ދާއިރާ މެމްބަރުކަން ކުރައްވާފައިވާ މުޙައްމަދު ރަޝީދު ނުވަތަ އާއްމު ނަމުން ނަމަ، މެޓްރިކްސް މޯޑު އައްޑޫ ސިޓީ ހިތަދޫގައި ދިރިއުޅެމުންދާގެ "ގާލެންޑް" އަނދާއަޅިއަށް ވެއްޖެއެވެ.
މި ހާދިސާއާއި ގުޅިގެން އެމްއެންޑީއެފުން ބުނީ، އެގޭގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މައުލޫމާތު އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނަށް ލިބުނީ ރޭ ފަތިހު 05:11 ހާއިރުކަމަށެވެ.
އަދި މައުލޫމާތު ލިބުމާއެކު، އެ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށެވެ.
މިގޮތުން، ފަޔަރފައިޓަރުން ކުރި މަސައްކަތުން، އެ ގޭގައި ރޯވެފައި ހުރި އަލިފާން އެއްކޮށް ނިއްވާލެވިފައިވަނީ ހެނދުނު 08:05 ހާއިރުކަމަށް އެމްއެންޑީއެފުން ބުންޏެވެ.
އެ ގެއަކީ މީހުން ދިރިއުޅެމުން އައި ގެއެއް ނަމަވެސް، މި ހާދިސާގައި އެއްވެސް މީހަކަށް އަނިޔާއެއްވިކަމުގެ މަޢުލޫމާތު ލިބިފައެއް ނުވާކަމަށް އެ އިދާރާއިން ބުނެއެވެ.
މި ހާދިސާއާއި ގުޅިގެން މެޓްރިކްސް މޯޑު ފޭސްބުކުގައި ކުރި ޕޯސްޓެއްގައި ވަނީ، ގޭގެ އެއްވެސް އެއްޗެއް ސަލާމަތް ނުކުރެވޭ ކަމަށާ މުޅި ގެ އެއްކޮށް އަނދައި ހުލިވެފައިވާ ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
