ބަރަކާތްތެރި ރަމަޟާންމަހާ ގުޅިގެން ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދިނުމަށް ނިންމި މަސްދަޅުކޭސް ބެހުމުގެ ކަންކަން ރޭގަނޑު ކުރިއަށްގެންދިއުމަށް ނިންމައިފިއެވެ.

މިކަމާ ގުޅޭގޮތުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ބުނެފައިވަނީ ރޯދަހަދިޔާގެ ގޮތުގައި ސަރުކާރުން ދިނުމަށް ނިންމި މަސްދަޅުކޭސް ދޫކުރުމުގެ ވަގުތާއި އުސޫލަށް ބަދަލު ގެނެސްފައިވާކަމަށެވެ. މިގޮތުން ޓޯކަން އުސޫލުން މަސްދަޅު ދޫކުރުމަށް ނިންމިއިރު، ދެން މަސްދަޅު ދޫކުރުމުގެ ކަންކަން ކުރިއަށްގެްދާނީ ރޭގަނޑުކަމަށް އެ އިދާރާއިން ވަނީ އިއުލާނުކޮށްފައެވެ.

މިކަމާ ގުޅިގެން މިނިސްޓަރ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވަރކްސް އާދަމް ޝަރީފް އުމަރު ވިދާޅުވީ، މިދުވަސްވަރަކީ ހޫނުގަދަ ދުވަސްވަރަކަށް ވާތީ ދުވާލު ރޯދަ ހަދިޔާ ދޫކުރުމެއް ނޯންނާނޭކަމަށެވެ. މިނިސްޓަރ ވިދާޅުވީ މާލެ ސަރަހައްދުގައި މަސްދަޅު ބެހުމުގެ ކަންކަން މީގެފަހުން ކުރިއަށްގެންދާނީ ރޭގަނޑު 20:00 ފެށިގެން 00:00 ނިޔަލަށް ކަމަށެވެ.

- މިފްކޯ ކޮމްޕްލެކްސް (މާފަންނު): 200 ޓޯކަން

- އެމް.ޓީ.ސީ.ސީ ސޯމިލް: 200 ޓޯކަން

- ހެންވޭރު ދަނޑު: 100 ޓޯކަން

- ގަލޮޅު ދަނޑު – ސެޓަޕް 1 : 50 ޓޯކަން

- ގަލޮޅު ދަނޑު – ސެޓަޕް 2 : 50 ޓޯކަން

- ގަލޮޅު ދަނޑު – ސެޓަޕް 3 : 50 ޓޯކަން

- ގަލޮޅު ދަނޑު – ސެޓަޕް 4 : 50 ޓޯކަން

- ސޯޝަލް ސެންޓަރު : 100 ޓޯކަން

- ވިލިމާލެ – ވެމްކޯ ސައިޓް: 100 ޓޯކަން

- ހުޅުމާލެ – އުމަރު ޒާހިރު ބިލްޑިންގ: 100 ޓޯކަން

- ހުޅުމާލެ – ޕޮލްކޯ ޓަވރ (ސީ ބްލޮކް): 100 ޓޯކަން

- ހުޅުމާލެ – ހިޔާ ޓަވަރު 10 : 100 ޓޯކަން

- ހުޅުމާލެ – ކާމިލްދީދި ޕްރީސްކޫލް: 100 ޓޯކަން  

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ބުނީ، މަސްދަޅުކޭސް ބަލާ އަންނައިރު އެ އަންނަ ފަރާތެއްގެ އައިޑީކާޑާއި ވޭތުވެދިޔަ ތިން މަސްދުވަހުގެ ކަރަންޓްބިލް ގެންނަންޖެހޭނޭ ކަމަށެވެ. 

މަސްދަޅުކޭސް ދޫކުރުން މިރޭ ފަށާއިރު، މާލޭގެ ހުރިހާ ގޭބިސީތަކަށް ރޯދަ ހަދިޔާ ލިބެންދެން މަސައްކަތް ކުރިއަށް ގެންދާނޭކަމަށް މިނިސްޓަރު އާދަމް ޝަރީފް ވަނީ ވިދާޅުވެފައެވެ.

ރޯދަ ހަދިޔާގެ ގޮތުގައި ސަރުކާރުން ދިނުމަށް ނިންމާފައިވާ މަސްދަޅުކޭސް ދޫކުރަން އެންމެ ފުރަތަމަ ފަށާފައިވަނީ މިމަހުގެ 20 ވަނަ ދުވަހުއެވެ. މިހާތަނަށް 9،000 ހާހަށްވުރެ ގިނަ މަސްދަޅުކޭސް ބަހާފައިވާަކމަށް ސަރުކާރުގެ ކަމާ ބެހޭ އިދާރާއިން ބުނެއެވެ. ފުރަތަމަ ރޭވެސް މަސްދަޅުކޭސް ލިބިގަތުމަށް ގިނަ ބަޔަކުވަނީ ކިއުތަކުގައި ޖެހިފައެވެ.