ކ.އަތޮޅު ފިޔަވައި މިދިޔަ ޑިސެމްބަރުމަހު ގްރީން ޓެކްސްގެ ގޮތުގައި ދައުލަތަށް އެންމެގިނައިން ޓެކްސް ދައްކާފައިވަނީ ރ.އަތޮޅުގެ ރިސޯތްތަކުންކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން ނެރެ އާއްމުކޮށްފައިވާ އެންމެފަހުގެ ގްރީން ޓެކްސް ރިޕޯތަށް ބަލާއިރު، ޑިސެމްބަރުމަހުގެ ތެރޭގައި ގްރީންޓެކްސްގެ ގޮތުގައި ޖުމްލަ 109.5 މިލިއަން ރުފިޔާ ވަނީ ލިބިފައެވެ. އެމެރިކާ ޑޮލަރުން ބަލާނަމަ އެއީ 7.1 މިލިއަން ޑޮލަރެވެ. ފިނޭންސްގެ ތަފާސްހިސާބަށް ބަލާއިރު، ގްރީން ޓެކްސްގެ ގޮތުގައި އެންމެބޮޑު އަދަދެއް ދައްކާފައިވަނީ، ކ.އަތޮޅުންނެވެ. އެއަތޮޅުގެ ޓޫރިޒަމް ވިޔަފާރިތަކުން ގްރީން ޓެކްސްގެ ގޮތުގައި 37 މިލިއަނަށްވުރެ ގިނަ ރުފިޔާ (2.3 މިލިއަން ޑޮލަރު) ލިބިފައިވާކަމަށް ފިނޭންސުން ބުނެެވެ. ކ.އަތޮޅަކީ އެންމެ ގިނަ ރިޯތްތަކާއި ގެސްޓްހައުސްތައް ހުންނަ އަތޮޅެވެ.

ކ.އަތޮޅު ފިޔަވައި ދެން އެންމެ ގިނައިން ގްރީންޓެކްސް ދައްކާފައިވަނީ ރ.އަތޮޅުންނެވެ. ރ.އަތޮޅުގައި ހުރި ޓޫރިޒަމް ވިޔަފާރިތަކުން ގްރީންޓެކްސްގެ ގޮތުގައި ވަނީ 12.7 މިލިއަން ރުފިޔާ ނުވަތަ 827،439 ޑޮލަރެވެ. މި ތަފާސްހިސާބަށް ބަލާއިރު ދެން އެންމެގިނައިން ގްރީންޓެކްސް ލިބުނު އަތޮުތަކުގެ ތެރޭގައި ހިމެނެނީ، ބ.އަތޮޅާއި، ބ.އަތޮޅާއި ގއ އަތޮޅުގެ އިތުރުން ވ.އަތޮޅެވެ.

ޑިސެމްބަރުމަހު ގްރީން ޓެކްސްގެ ގޮތުގައި 109.5 މިލިއަން ރުފިޔާ ލިބުނުއިރު މީގެ ތެރެއިން 3.6 މިލިއަން ރުފިޔާ އަކީ ސަފާރީ ބޯޓުތަކުން ލިބުނު އަދަދެވެ. ގެސްޓްހައުސްތަކުން 7.9 މިލިއަން ރުފިޔާ ލިބުނުއިރު ރިސޯޓްތަކުން 95.4 މިލިއަން ރުފިޔާ ލިބުނެވެ.

ގްރީން ޓެކުހަކީ ރާއްޖޭގައި ހިންގާ ޓޫރިސްޓު ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ޓޫރިސްޓު ހޮޓާތަކާއި، ހޮޓާތަކާއި، ޓޫރިސްޓު ގެސްޓްހައުސްތަކާއި، ޓޫރިސްޓު އުޅަނދުތަކާއި، އެ ނޫން ވެސް އެފަދަ ތަންތަނަށް އަންނަ ޓޫރިސްޓުންގެ އަތުން ނެގޭ ޓެކުހެކެވެ. މިދިޔަ އަހަރު ގްރީން ޓެކްސް 6 ޑޮލަރާއި 3 ޑޮލަރުގެ އަދަދަކުން ގްރީން ޓެކްސް ނަގަމުންދިޔަނަމަވެސް މިއަހަރުގެ ޖެނުއަރީމަހުން ފެށިގެން ގްރީން ޓެކްސް ރޭޓް ވަނީ ބޮޑުކޮށްފައެވެ. އެގޮތުން ޖެނުއަރީމަހުގެ 1 ކުން ފެށިގެން ރިސޯޓަށް އަންނަ ކޮންމެ ފަތުރުވެރިއަކު އެ ހުންނަ ދުވަހަކަށް 12 ޑޮލަރު ނަގާއިރު، 50 އެނދަށްވުރެ މަދުން ހުންނަ ގެސްޓްހައުސްތަކަސް އަންނަ ފަތުރުވެރިއަކު އެ ހުންނަ ދުވަހަކަށް ނަގަނީ 6 ޑޮލަރެވެ.