ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ)ގެ ހިދުމަތް ހއ. ދިއްދޫގައި ފަށައިފިއެވެ.

ދިއްދޫގައި މި ހިދުމަތް ރަސްމީކޮށް ފައްޓަވައިދެއްވީ މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމެވެ.

މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ ވެމްކޯއިން ރާއްޖޭގައި ކުރާ މަސައްކަތުގެ ސަބަބުން ތިމާވެށްޓަށް ފައިދާވާނެ ކަމަށާއި، އޭގެ އިތުރުން ރައްޔިތުންގެ ސިއްހަތާއި ދުޅަހެޔޮކަމުގެ އިތުރުން ވިޔަފާރިތަކަށްވެސް ފައިދާ ކުރާނެ ކަމަށެވެ.

މިނިސްޓަރު ވިދާޅުވީ ދެމެހެއްޓެނިވި އަދި ތިމާވެއްޓާ ރައްޓެހި ކުނި މެނޭޖްކުރުމުގެ އުސޫލުތައް ފެށޭނީ ކުޑަކުދިންގެ ކިބައިން ކަމަށެވެ.

ކޮންމެ މުޖުތަމައެއްގައިވެސް ރައްކާތެރިކަމާއެކު ކުނި ބެލެހެއްޓުމަށް ހަގީގަތުގައި ހިތްވަރުދޭ އެއް ބަޔަކީ ކުޑަކުދިން ކަމަށް މިނިސްޓަރ ވިދާޅުވިއެވެ. އަދި މިކަމުގައި ވަކިން ހާއްސަކޮށް ހަރަކާތްތެރިވާނީ ސްކޫލް ކުދިން ކަމުގައި މިނިސްޓަރ ވިދާޅުވެފައި ވެއެވެ. ކުޑަކުދިންނަށް ބޭނުންވާ ވަރަށް އެކަށީގެންވާ މައުލޫމާތު ދީފިނަމަ ގޭބިސީތަކުން ކުނީގެ ބާވަތްތައް ބަހާލައިގެން އުކާލާނެ ކަމަށް މިނިސްޓަރ ވިދާޅުވެފައި ވެއެވެ. ނަތީޖާއެއްގެ ގޮތުން ކުނި މެނޭޖްކުރަން ވަރަށް ފަސޭހަވާނެ ކަމަށްވެސް މިނިސްޓަރ ވިދާޅުވެފައި ވެއެވެ. 

މި ރަސްމިއްޔާތުގައި ވާހަކަ ދައްކަވަމުން ވެމްކޯގެ މެނޭޖިން ޑިރެކްޓަރ މުޖުތަބާ ޖަލީލް ވިދާޅުވީ ރާއްޖޭގެ ހުރިހާ ރަށްރަށަށްވެސް މި ހިދުމަތް ފުޅާކުރަމުން ގެންދާނެ ކަމަށާއި ކުންފުނީގެ ކުރިއެރުމަށް ބޭނުންވާ ކޮންމެ ކަމެއް ކުރުމަށް މުވައްޒަފުން އަބަދުވެސް ތައްޔާރަށް ތިބޭނެ ކަމަށެވެ.

ރަށްރަށުގެ ގޭބީސީތަކުން ގޮނޑުދޮށަށް ކުނި އުކާލައިގެން އެ ސަރަހައްދު ފުރިގެން ދާއިރު ކައުންސިލަށް ކުރެވޭނެ އިތުރު ކަމެއް ނުހުންނާނެކަމަށް މުޖުތަބާ ވިދާޅުވިއެވެ. ކުނި އޮފްލޯޑް ކުރެވޭނީ ހަމައެކަނި ވެމްކޯއާއި ގުޅިގެން ކުނި މެނޭޖްމަންޓް ސައިޓަށް ކުނި ގެންގޮސްގެންކަން މުޖުތަބާ ފާހަގަކުރެއްވިއެވެ.