ރަމަޟާންމަހާއި ހޫނުމޫސުމާ ދިމާވާތީވެ މާލެ ސަރަހައްދުގެ ކަރަންޓް ކެޕޭސިޓީ އިތުރުކުރުމުގެ މަސައްކަތް ސްޓެލްކޯއިން ފަށައިފިއެވެ.
މިކަމާ ގުޅޭގޮތުން ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ މީޑިއާގައި ވިދާޅުވެފައިވަނީ، ކުރިއަށްއޮތް ރަމަޟާންމަހު ކަރަންޓް ބޭނުންކުރާ މިންވަރާ އެއްވަރަށް ސްޓެލްކޯގެ ކެޕޭސިޓީ އިތުރުކުރުމުގެ މަސައްކަތް ފަށާފައިވާކަމަށެވެ. އެގޮތުން އިތުރުވާ މިންވަރަށް އިތުރު ޖަނަރޭޓަރުތައް އިންސްޓޯލްކުރުމުގެ މަސައްކަތް ފަށާފައިވާކަން ފަހުމީ ވިދާޅުވިއެވެ.
ކުރިއަށްއޮތީ ހޫނުގަދަ ދުވަސްވަރެއްކަމުން ރޯދަމަހާއި އެދުވަސްތަކާ ދިމާވާތީވެ، ކަރަންޓް ބޭނުންކުރާ މިންވަރު އިތުރުވާނޭކަމަށް ސްޓެލްކޯއިން ވަނީ ލަފާކޮށްފައެވެ. އެގޮތުން ގޭބިސީތަކުން ކަރަންޓް އިތުރަށް ބޭނުންކުރާނޭ ވަރު ބަލައި މިހާރުގެ ކަރަންޓް ކެޕޭސިޓީއަށް 17 މެގަވޮޓް އިތުރުކުރުމަށް ސްޓެލްކޯއިން ވަނީ ނިންމާފައެވެ.
ފަހުމީ ވިދާޅުވީ މިދިޔަ އަހަރުވެސް ކަރަންޓް އެންމެބޮޑަށް ޕީކަށް އަރައިގެންދިޔައިރު، 114 މެގަވޮޓްގެ ކަރަންޓް ބޭނުންކޮށްފައިވާކަމަށެވެ. އެގޮތުން މިއަހަރު އެއަދަދު 132 މެގަވޮޓަށް އަރާނޭކަމަށް ބެލެވޭކަމަށްފަހުމީ ވަނީ ފާހަގަކުރައްވާފައެވެ. ކަރަންޓް ކެޕޭސިޓީ އިތުރުކުރުމަށް ކުރަމުންގެންދާ މަސައްކަތް ރަމަޟާންމަސް ފެށުމުގެ ކުރިން ނިންމާލެވޭނޭކަމަށާއި، އެގޮތުން ކުރިއަށްއޮތް 8 ދުވަހުގެ ތެރޭގައި މަސައްކަތް ނިމޭނޭކަމަށް ފަހުމީ ވަނީ ވިދާޅުވެފައެވެ.
ފަހުމީ ވަނީ މިފަހަރުގެ ރަމަޟާންމަހު ކަރަންޓް ބޭނުންކުރާ މިންވަރު އިތުރުވުމާ ގުޅިގެން ކަރަންޓް ކަނޑަން ނުޖެހޭނޭކަމުގެ ޔަގީންކަންދެއްވާފައެވެ.
Advertisement
This content is created and paid for by advertisers and does not involve Voice Journalists
