181 މިލިއަން ރުފިޔާގެ އަގަކަށް ދ. އަތޮޅު ހޮސްޕިޓަލް އައު އިމާރާތް ބިނާކުރުމުގެ މަސައްކަތް، ރޯޑް ޑެވެލޮޕްމަންޓް ކޯޕަރޭޝަން ލިމިޓެޑް (އާރުޑީސީ) އާއި ހަވާލުކޮށްފިއެވެ.

މިކަމަށްޓަކައި މިއަދު ބޭއްވި ހާއްސަ ރަސްމިއްޔާތެއްގައި މިނިސްޓްރީ އޮފް ހެލްތުގެ ފަރާތުން އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ އަޙުމަދު ޤާސިމެވެ. އަދި ރޯޑް ޑެވެލޮޕްމަންޓްގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ މުޙައްމަދު އަސްބާހް އަލީ ނަސީރެވެ. 

އާރްޑީސީ އާއި މި މަސައްކަތް ކުރަން ހަވާލުކުރީ 540 ދުވަހުގެ ތެރޭގައި މަސައްކަތް އެއްކޮށް ނިންމާ ގޮތަށެވެ.

ރައީސް ޑރ. މުޙައްމަދު މުޢިއްޒު ދ. އަތޮޅަށް ކުރެއްވި ދަތުރުފުޅުގެ ތެރެއިން މިއަދު ވަނީ މި އިމާރާތުގެ ބިންގާ އެޅުމުގެ ރަސްމިއްޔާތު ބާއްވާފައެވެ. މި އިމާރާތުގެ ބިންގާ އަޅުއްވައިދެއްވީ ސިޓީސް މިިނިސްޓަރ އާދަމް ޝަރީފް އުމަރެވެ. 

ހެލްތް މިނިސްޓްރީ އިން ބުނީ 50 އެނދު ބަހައްޓާގޮތަށް ދ.ކުޑަހުވަދޫގައި ޤާއިމްކުރާ އަތޮޅުގެ ހޮސްޕިޓަލްގެ މަސައްކަތް ނިމޭއިރު، އެތަނުގައި މެމޮގްރަފީ ހިދުމަތާއި، ޑެންޓަލް އޯޕީޖީ، ކަށީގެ ފަރުވާތަކަށް ޚާއްސަ އޯތޯ-ތިއޭޓަރ ޤާއިމްކުރުމުގެ އިތުރުން ހޮސްޕިޓަލްގެ ސްޓާފުންނަށް ޓްރެއިނިންގ ދިނުމަށް ބޭނުންވާނެ ފެސިލިޓީވެސް ޤާއިމްކުރެވިގެންދާނެ ކަމަށެވެ.

މި ހޮސްޕިޓަލަކީ އަތޮޅު ހޮސްޕިޓަލަކަށްވާތީ، އަތޮޅުތެރޭގެ މަސައްކަތްކުރާ މުވައްޒަފުންނަށް ބޭނުންވާ ތަމްރީންދިނުމަށް ބޭނުންވާ ފެސިލިޓީއާއި ޕްރައިވެޓް ރޫމް ފެސިލިޓީތައްވެސް ޤާއިމްކުރެވިފައި ހުންނާނެ ކަމަށް މިނިސްޓްރީން މައުލޫމާތު ދެއެވެ.

ކުޑަހުވަދޫއަކީ އެއަރޕޯޓެއް އޮންނަ ރަށަކަށްވާތީ، އެމަޖެންސީ ހާލަތްތަކުގައި ބޭނުންކުރުމަށް އިމަޖެންސީ އީއާރެއް ޤާއިމްކުރުމަށްވެް ވަނީ ހަމަޖެހިފައެވެ.

އައު ހޮސްޕިޓަލް ޢިމާރާތްތައް ޤާއިމްކޮށް ޚިދުމަތްދޭން ފެށުމާއެކު، ޖާގައިގެ ދަތިކަން ހައްލުވެ، އެތަންތަން ގިންތިކޮށްފައިވާ މިންވަރަށް ތަނުން ފޯރުކޮށްދޭންޖެހޭ އެންމެހާ ޚިދުމަތްތައް ރައްޔިތުންނަށް ފޯރުކޮށްދެވިގެންދާނެއެވެ. އަދި ރަށުންނާއި ރަށާއި ކައިރި އާބާދީތަކުގެ ރައްޔިތުންނަށްވެސް ޚިދުމަތް ލިބިގަތުމުގައި އެތަކެއް ލުއި ފަސޭހަތަކެއް ވެގެންދާނެ ކަމަށްވެސް ހެލްތު މިނިސްޓްރީން ބުނެއެވެ. ހޮސްޕިޓަލުގެ ބޭނުން ކުރާ ހަކަތައަށް ކުރާ ޚަރަދު ކުޑަ ކުރުމުގެ ގޮތުން މި ޕްރޮޖެކްޓުގެ ދަށުން ހޮސްޕިޓަލުގައި ސޯލަރ ޕީވީ ސިސްޓަމް ހަރުކުރުމަށް ހަމަޖެހިފައި ވެއެވެ. ހޮސްޕިޓަލުގެ ހުރިހާ އެނދަކަށް ޕައިޕްޑް އޮކްސިޖަން، މެޑިކަލް އެއަރ އަދި ސަކްޝަން އެޅިފައިވާނެ ކަމަށާއި ހޮސްޕިޓަލްގެ އޮޕަރޭޝަންތައް ނުހުއްޓި ކުރިއަށް ގެންދިއުމަށްޓަކައި ޕަވަރބެކަޕް ސިސްޓަމެއް ޤާއިމްކުރާ ގޮތަށްވެސް ވަނީ ހަމަޖެހިފައި ވެއެވެ.