ކުރީއަހަރެކޭ އެއްގޮތަށް މިފަހަރުގެ ރަމަޟާންމަހު ފެނާއި ކަރަންޓު ބިލްތަކުން ރައްޔިތުންނަށް ޑިސްކައުންޓް ލިބޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިފަހަރުގެ ރަމަޟާންމަހަށް ރޯދަ ހަދިޔާގެ ގޮތުގައި ސަރުކާރުން މަސްދަޅުކޭސް ބަހަން ފެށުމާ ގުޅިގެން އިދިކޮޅު ފަރާތްތަކުންވަނީ އެކަމަށް ވަރަށްބޮޑަށް ފާޑުކިޔައި ވާހަކަތައް ދައްކަން ފަށާފައެވެ. އެގޮތުން ސަރުކާރުން ރައްޔިތުންނަށް މަސްދަޅުކޭސް ހަދިޔާގެ ގޮތުގައި ބަހަނީ، ކުރިއަށްއޮތް ރަމަޟާންމަހު ކަރަންޓް ބިލްތައް ބޮޑުކުރުމުގެ ނިޔަތުގައިކަން އިދިކޮޅަށް ނިސްބަތްވާ ބައެއް ފަރާތްތަކުން ވަނީ ބުނެފައެވެ.

އެކަމަށް ރައްދުދެއްވައި ރައީސް ޑރ.މުއިއްޒު މިރޭ ވިދާޅުވީ، ސަރުކާރުން ރައްޔިތުންނަށް މަސްދަޅު ބަހަނީ ބިލްތައް ބޮޑުކުރުމުގެ ނިޔަތުގައި ނޫންކަމަށާއި، އެއީ ކުރިންވެސް ރައްޔިތުންނަށް ވީ ވައުދެއްކަމަށެވެ. ރައީސް ވިދާޅުވީ އެކަމާ ގުޅުވައިގެން ރައްޔިތުންނަށް އޮޅުވާލުމަށް ބައެއް ފަރާތްތަކުން ރައްޔިތުންނަށް އޮޅުވާލުމަށް ދޮގު ބުހުތާން ވާހަކަތަކެއް ދައްކަންމުންދާކަމަށެވެ. އެގޮތުން އެންމެ ފުރަތަމަ ދެއްކީ ރައްޔިތުންނަށް ހަދިޔާގެ ގޮތުގައި ބަހާ މަސްދަޅުން މަސް މަދުކޮށްފައި ބަހަންއުޅޭކަމުގެ ވާހަކަ ކަމަށާއި، ނަމަވެސް މިއަދު އެއީ ދޮގެއްކަން އެނގި ހާމަވެފައިވާކަމަށެވެ. 

Advertisement

ރައީސް ވިދާޅުވީ ރަމަޟާންމަހު ހަދިޔާގެ ގޮތުގައި މަސްދަޅު ދިނުމުގެ އިތުރުން ކުރިއަށްއޮތް ރަމަޟާންމަހުވެސް ކަރަންޓް ބިލާއި ފެންބިލުން ރައްޔިތުންނަށް ޑިސްކައުންޓް ދިނުމަށް ނިންމާފައިވާ ކަމަށެވެ. އަދި މިދިޔަ ފަހަރުގެ ރަމަޟާންމަހުވެސް އެގޮތަށް އެކަންކޮށްފައިވާކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ކަންކަން އޮޅުވާލުމަށްޓަކައި މުޖުތަމައުގެ ތެރޭގައި ހަޤީޤަތާ ހިލާފް ވާަހަކަތައް ދެއްކުން އޮންނަނީ ކަންބޮޑުވާ ދަރަޖައަކަށް ކަމަށާއި، މިއީ ރައްޔިތުން ވަރަށް ސީރިއަސްކޮށް ވިސްނަންޖެހޭ ކަމެއްކަމަށެވެ.