ދެ އަހަރަށް ބަހާލައިގެން ހުރިހާ ރަށެއްގައި ފިޓްނެސް ސެންޓަރުތައް ގާއިމުކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިގޮތަށް ވިދާޅުވީ މިހާރު ދ. އަތޮޅަށް ކުރައްވަމުންގެންދަވާ ރަސްމީ ދަތުރުފުޅުގައި ދ. މާއެނބޫދޫ ރައްޔިތުންނާއިއެކު ބޭއްވި ބައްދަލުވުމުގައެވެ.
މި ބައްދަލުވުމުގައި ވާހަކަދައްކަވަމުން ރައީސް ވިދާޅުވީ ދެ އަހަރަށް ބަހާލައިގެން މުޅި ރާއްޖޭގެ ހުރިހާ ރަށްރަށުގައި ފިޓްނެސް ސެންޓަރުތައް ގާއިމުކުރައްވާނެ ކަމަށެވެ. އަދި އައުޓްޑޯ ޖިމާއި ކުޑަކުދިންގެ ޕާކްތައްވެސް ހުރިހާ ރަށެއްގައި 2 އަހަރަށް ބަހާލައިގެން ގާއިމުކުރައްވާނެ ކަމުގައި ރައީސް ވިދާޅުވިއެވެ. މާއެނބޫދުގައި ކުޑަކުދިންގެ ޕާކް އެޅުމަށްވެސް ރާއްވާފައިވާ ކަމަށް ވިދާޅުވި އެވެ.
ކުޑަކުދިންގެ ޕާކްތައް ނެތް ރަށްރަށުގައި މިއަހަރާއި އަންނަ އަހަރު ތެރޭގައި ބިނާކޮށް ނިންމާލެވޭނެ ކަަމުގައި ރައީސް ވިދާޅުވިއެވެ. ސަރުކާރުގެ ކުޅިވަރު ސިޔާސަތުގެ ދަށުން ރަށްރަށުގައި ތިބި ވަސީލަތްތައް މަދު, ކުޑަކުދިންގެ ޕާކްތަކާއި އައުޓްޑޯ ޖިމްތައް އިތުރަށް ފުރިހަމަ ކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.
ހުރިހާ ރަށެއްގައި ކުޅިވަރު ދަނޑުތައް އެޅުމަށް ބޭނުންވާ ސާމާނު ބަލްކުކޮށް ގެނެސް، އެ ރަށްރަށުގައި ފުޓްސެލް އަދި ފުޓްބޯޅަ ދަނޑުތައް އެޅުމުގެ މަސައްކަތް ކުރުމަށް ރާވާފައިވާ ކަމަށް ރައީސް ވިދާޅުވި އެވެ.
މާއެނބޫދޫ ރައްޔިތުންނާއި މުހާތަބުކުރައްވަމުން ރައީސް ވަނީ އެރަށުގައި ހުއްޓިފައިވާ ހުރިހާ މަޝްރޫއުތައް އަލުން ފައްޓަވައިދެެއްވާނެ ކަމަށް ވެސް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
