ސަރުކާރުގެ ފަރާތުން ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ބިލެއް ހުށަހެޅީ، އެ ކޯޓަށާއި ޖުޑިޝަރީއަށް ނުފޫޒު ފޯރުވުމުގެ އަމަލެއްކަމަށް ދަ ޑިމޮކްރެޓްސް އިން ބުނެފި އެވެ.

ދަ ޑިމޮކްރެޓްސް ޕާޓީން ނެރުނު ނޫސްބަޔާނެއްގައި މިހެން ބުނެފައިވަނީ، ސުޕްރީމް ކޯޓުގައި މިހާރު ތިއްބެވި ހަތް ފަނޑިޔާރުންގެ އަދަދު ފަސް ފަނޑިޔާރުންނަށް މަދުކުރުމަށް ވެރިކަން ކުރާ ޕީއެންސީގެ ފަރާތުން މަޖިލީހަށް ބިލެއް ހުށަހެޅުމާއި ގުޅިގެންނެވެ. 

 މި ބިލް މަޖިލީހަށް ހުށަހެޅުއްވީ ހޮޅުދޫ ދާއިރާގެ މެމްބަރުން އަބްދުއްސައްތާރު މުހައްމަދެވެ.

Advertisement

ޑިމޮކްރެޓްސް އިން ނެރުނު ބަޔާނުގައި ވަނީ ސުޕްރީމް ކޯޓް ބަދަލުކުރާނެކަމުގެ ތުހުމަތު ސަރުކާރުގެ މައްޗަށް މީގެ ކުރިން ކުރަމުންދިޔަ ނަމަވެސް، ސަރުކާރުން އެކަމަށް އިންކާރުކުރުމަށް ފަހުގައި، ކުއްލިގޮތަކަށް ސުޕްރީމް ކޯޓްގެ ފަނޑިޔާރުންގެ އަދަދު މަދުކުރުމަށް ރައްޔިތުންގެ މަޖިލީހަށް ބިލެއް ހުށަހަޅާފައިވުމުން، މިއީ އެ ކޯޓަށް ނުފޫޒު ފޯރުވުމުގެ އަމަލެއްކަމަށް ބެލުމުގެ ޖާގަ އެބައޮތް ކަމަށެވެ.

ޑިމޮކްރެޓްސް އިން ބުނެފައިވަނީ "ކޯޓް ޕެކިން" ގެ ޓެކްޓިކަކީ މަތީ ކޯޓްގެ ކޮންޓްރޯލް ނެގުމަށް ގައުމުތަކުގައި އާންމުކޮށް ސަރުކާރުތަކުގެ ސިޔާސީ ބާރުވެރިކަމުގެ ތެރެއިން ކޮށްއުޅޭ ކަމެއް ކަމަށެވެ .ދައުލަތުގެ އެއްވެސް ބާރަކަށް ލިބިގެންވާ ބާރުތަކުގެ މައްޗަށް އަނެއް ބާރަކުން އަރައިނުގަނެ، ނުވަތަ ނާޖާއިޒު ނުފޫޒު ނުފޯރުވައި، ދައުލަތް އޮމާންކަމާއެކު ޑިމޮކްރެޓިކް ހަމަތަކުގެ މަތިން ހިނގުމަށް ޖާގަދީގެން މެނުވީ ރާއްޖޭގެ ޑިމޮކްރެސީއަށާއި ރައްޔިތުންނަށް ފައިދާއެއްނުކުރާނެ ކަމަށްވެސް ޑިމޮކްރެޓްސް އިން ވަނީ ބުނެފަ އެވެ.ސުޕްރީމް ކޯޓްގެ ފަނޑިޔާރުންގެ އަދަދު މަދުކުރުމަށް ސަރުކާރުން މިވަގުތު ހުށަހަޅާފައިވާ ހުށަހެޅުމަކީ އެ ކޯޓަށް ނުފޫޒުހިންގުމުގެ އަމަލެއްކަމަށް ބެލެވޭތީ، އެކަން ވަގުތުން ހުއްޓާލުމަށްވެސް ޑިމޮކްރެޓްސް އިން ވަނީ ސަރުކާރަށް ގޮވާލާފަ އެވެ.  

ސްޕްރީމްކޯޓުގެ ބެންޗު އެކުލެވިގެންވަނީ 7 މެމްބަރުންގެ މައްޗަށެވެ. ސްޕްރީމްކޯޓުގެ ބެންޗް ބަދަލުކުރަން ސަރުކާރުން ހުށަހެޅި މި ބިލް ހުށަހެޅީ މީގެ ކުރިން ސްޕްރީމް ކޯޓުގެ ބެންޗު އޮތްގޮތަށް ބޭއްވުމެވެ. ސްޕްރީމް ކޯޓުގެ ބެންޗު ބަދަލުކުރުމަށް ޤާނޫނު އަސާސީއަށް ގެނައި އިސްލާހާއެކު 2014 ވަނަ އަހަރު ވަނީ އެ ކޯޓްގެ ބެންޗު ފަހަކަށް ބަދަލުކޮށްފައެވެ. އޭގެފަހުން ސްޕްރީމްކޯޓުގައި ތިބޭ ފަނޑިޔާރުންގެ އަދަދު އިތުރުކޮށްފައިވަނީ ރައްޔިތުން މަޖިލީހުގެ މިދިޔަ ދައުރުގެ ތެރޭގައެވެ.