ސުޕްރީމް ކޯޓުގެ ބެންޗް ކުޑަކުރުމާއި ދެކޮޅަށް އިހުތިޖާޖު ކުރުމަށް އެމްޑީޕީގެ ޗެއާޕާސަން ފައްޔާޒް އިސްމާޢީލް ގޮވާލައްވައިފިއެވެ.

އެކްސްގައި ކުރެއްވި ޓްވީޓެއްގައި ފައްޔާޒް މިގޮތަށް ގޮވާލެއްވީ ސުޕްރީމް ކޯޓުގައި މިހާރު ތިއްބެވި ހަތް ފަނޑިޔާރުންގެ އަދަދު ފަސް ފަނޑިޔާރުންނަށް މަދުކުރުމަށް ވެރިކަންކުރާ ޕީއެންސީގެ ފަރާތުން ރައްޔިތުންގެ މަޖިލީހަށް ހުށަހެޅުއްވި ބިލާއި ގުޅިގެންނެވެ.

މަޖިލީހަށް މި ބިލް ހުށަހަޅުއްވާފައިވަނީ ހޮޅުދޫ ދާއިރާގެ މެމްބަރުން އަބްދުއްސައްތާރު މުޙައްމަދެވެ.

މިކަމާއި ނުރުހުން ފާޅުކުރައްވަމުން ފައްޔާޒް ވިދާޅުވީ ރާއްޖޭގެ ޖުޑީޝަރީ އިސްލާހު ކުރުމަށް މިހާތަނަށް އެޅުނު އެންމެ ހަރުދަނާ ފިޔަވަޅަކީ 2019 އަދި 2020 ވަނަ އަހަރު ސުޕްރީމް ކޯޓުގެ ބެންޗަށް އެމްޑީޕީ ސަރުކާރުން ގެނައި ބަދަލު ކަމަށެވެ. ފަނޑިޔާރުންގެ އަދަދު މަދުކުރަން ޕީއެންސީ އިން އެ ކުރާ މަސައްކަތަކީ މުޅި ޖުޑީޝަރީގެ މިނިވަންކަމަށް ދޭ ހަމަލާއެއްގެ ގޮތުގައި ފައްޔާޒް ސިފަކުރައްވާފައި ވެއެވެ. ސަރުކާރުގެ މި އަމަލުގައި ބައިވެރި ނުވުމަށް ރައްޔިތުންގެ މަޖިލީހުގެ މެންބަރުންގެ އަރިހުން ފައްޔާޒް ވަނީ އެދިވަޑައިގެންފައެވެ. މުޅި ޝަރުއީ ދާއިރާއިން މިކަމާ ދެކޮޅަށް އިހުތިޖާޖު ކުރުމަށް ފައްޔާޒް ގޮވާލެއްވިއެވެ. 

ފައްޔާޒް ވިދާޅުވީ މިއީ ޑިމޮކްރަސީ އާއި ޖުޑީޝަރީގެ މިނިވަންކަމުގައި ގައުމެއްގެ ގޮތުގައި ފަހަތަށް އެޅޭ ބޮޑު ފިޔަވަޅެއް ކަމަށެވެ. ސުޕްރީމް ކޯޓަށް ދުސްތޫރީ މައްސަލަ ހުށަހެޅުމާއެކު އެ ކޯޓުގެ ފަނޑިޔާރުންނަށް ބިރު ދައްކައި، ފިޔަވަޅު އަޅައި، ވަކިކުރާނެ ކަމުގެ އިންޒާރު ދިނުމަށްފަހު މިހާރު ސަރުކާރުން އެ މަސައްކަތް ކުރައްވަނީ ފަނޑިޔާރުން މަދު ކުރުމަށް ކަމަށް ފައްޔާޒް ވަނީ ތުހުމަތު ކުރައްވާފައެވެ. 

ސުޕްރީމްކޯޓުގެ ބެންޗު އެކުލެވިގެންވަނީ 7 މެމްބަރުންގެ މައްޗަށެވެ. ސުޕްރީމް ކޯޓުގެ ބެންޗް ބަދަލުކުރަން ސަރުކާރުން ހުށަހެޅި މި ބިލް ހުށަހެޅީ މީގެ ކުރިން ސްޕްރީމް ކޯޓުގެ ބެންޗު އޮތްގޮތަށް ބޭއްވުމެވެ. ސުޕްރީމް ކޯޓުގެ ބެންޗު ބަދަލުކުރުމަށް ޤާނޫނު އަސާސީއަށް ގެނައި އިސްލާހާއެކު 2014 ވަނަ އަހަރު ވަނީ އެ ކޯޓްގެ ބެންޗު ފަހަކަށް ބަދަލުކޮށްފައެވެ. އޭގެފަހުން ސުޕްރީމް ކޯޓުގައި ތިބޭ ފަނޑިޔާރުންގެ އަދަދު އިތުރުކޮށްފައިވަނީ ރައްޔިތުންގެ މަޖިލީހުގެ މިދިޔަ ދައުރުގެ ތެރޭގައެވެ.

ސުޕްރީމް ކޯޓުގައި ތިބޭ ފަނޑިޔާރުންގެ އަަދަދު މަދުކުރުމުގެ މަސައްކަތް ސަރުކާރުން ފެއްޓިއިރު، ކުރީގެ ރައީސް އިބްރާހިމް މުޙައްމަދު ޞާލިޙު ވިދާޅުވެފައިވަނީ މި ސަރުކާރުން އަދި ސުޕްރީމް ކޯޓުގެ ބެންޗުވެސް ބަދަލުކުރާނޭ ކަމަށެވެ. އަދި އެމްޑީޕީންވެސް ވަނީ މި ސަރުކާރުން 3 ފަނޑިޔާރުން މަދުކުރަން އުޅޭކަމަށް ބުނެފައެވެ.