މިއަހަރުގެ ދިރާސީ އައު އަހަރު ފަށާ ދުވަހެއްގެ ގޮތުގައި އޭޕްރީލް 7، އެޑިއުކޭޝަން މިނިސްޓްރީން ހަމަޖައްސައިފިއެވެ.

މިއަދު އެޑިއުކޭޝަން މިނިސްޓްރީން އާންމުކުރި ތައުލީމީ ކަލަންޑަރުގައިވާ ގޮތުން ފުރަތަމަ ޓާމްގެ ޗުއްޓީ ޖުލައިމަހުގެ 24 ވަނަދުވަހަށް ހަމަޖައްސާފައިވާއިރު، ދެވަނަ ޓާމް ފެށުމަށް ހަމަޖެހިފައިވަނީ އޮގަސްޓް މަހުގެ 10 ވަނަ ދުވަހު އެވެ.

ދިރާސީ އަހަރު ނިމޭނީ ޑިސެމްބަރު މަހުގެ 28 ވަނަ ދުވަހު އެވެ.

Advertisement

މީގެ ކުރިން ރާއްޖޭގައި ތައުލީމީ އަހަރުތައް އަބަދުވެސް ފެށުނީ ޖެނުއަރީ މަހުގައެވެ. ނަމަވެސް، ކޯވިޑް 19 ގެ ދުވަސްވަރު އައި ލޮކްޑައުން މުއްދަތަށްފަހު ދިރާސީ އަހަރު ފެށުން ބަދަލު ކުރި އެވެ. ދިރާސީ އަހަރު ފެށޭ ތާރީހަށް ބަދަލު ގެނެސްފައިވަނީ ރައީސް ސޯލިހު ވެރިކަމުގައެވެ. އޭރު ސަރުކާރުން އެކަން ކޮށްފައިވަނީ،  ޓޫރިޒަމް ދާއިރާގެ ދިވެހި މުވައްޒިފުން އެދޭތީ ކަމަށް ބުނެ އެވެ.

މި ބަދަލާއެކު އަހަރީ ސްކޫލް ބަންދު ދުވަސްތައް ޖޫން/ޖުލައި މަހުގެ ތެރޭގައި ފެށޭގޮތަށް އޭރުގެ އެޑިއުކޭޝަން މިނިސްޓްރީން ހަމަޖެއް ސިއެވެ. މިކަމުގެ ސަބަބުން ބައެއް ބެލެނިވެރިން ވަނީ އުނދަގޫތެއް މެދުވެރިވާ ކަމަށް ޝަކުވާކޮށްފައެވެ. އެ ދުވަސްވަރަކީ އެންމެ ވިއްސާރަ ދުވަސްވަރަށްވާތީ ދަތުރުފަތުރު ކުރުމުގައި ދަތި ދިމާވެ ޗުއްޓީއަށް ބުރޫ އަރަ އެވެ.

މި ކަންބޮޑުވުންތަކަށް އަލިއަޅުވާލައްވަމުން ރައީސް ޑރ. މުޙައްމަދު މުޢިއްޒު ވަނީ 2026 ވަނަ އަހަރުން ފެށިގެން ދިރާސީ އަހަރު އަލުން ޖެނުއަރީ މަހު ފެށޭ ގޮތަށް ބަދަލު ކުރައްވާނެކަން އިއުލާން ކުރައްވާފައެވެ.

މިއަހަރުގެ ސްކޫލް ޗުއްޓީ ޑިސެމްބަރު މަހުގެ 28 އިން ޖެނުއަރީ 27 އަށް ކުރިއަށް ގެންދާއިރު، އަންނަ އަހަރުގެ އަހަރީ ޗުއްޓީ ޑިސެމްބަރު މަހުގެ ތެރޭގައި ލިބޭނެ ކަމަށް އެޑިއުކޭޝަން މިނިސްޓްރީން މީގެކުރިން ވަނީ އިއުލާންކޮށްފަ އެވެ.