އެމްޑަބްލިޔުއެސްސީ މުވައްޒަފުންނާއި މޯލްޑިވްސް ބްލަޑް ސާވިސަސް ގުޅިގެން ލޭ ހަދިޔާ ކުރުމުގެ ހަރަކާތެއް މިއަދު ކުރިއަށް ގެންގޮސްފިއެވެ.

އެމްޑަބްލިޔުއެސްސީ ކަސްޓަމަރ ސާރވިސް އިމާރާތުގައި ކުރިއަށް ގެންދިޔަ މި ލޭދިނުމުގެ ޙަރަކާތް ފައްޓަވައި ދެއްވީ އެމްޑަބްލިޔުއެސްސީގެ މެނޭޖިން ޑިރެކްޓާ ޢަބްދުލްމަތީން މުޙައްމަދު އާއި އެކުންފުނީގެ ޗެއާޕާރސަން ޝަމްހޫޒާ އަޙުމަދެވެ. މިހަރަކާތުގައި އެކުންފުނީގެ ސީނިއާ މެނޭޖްމަންޓާއި ގިނަ އަދަދެއްގެ މުވައްޒަފުންގެ އިތުރުން، މާލޭ ސިޓީ ކައުންސިލްގެ މޭޔަރު އާދަމް އާޒިމް އަދި ކައުންސިލުގެ މުވައްޒަފުންވެސް ވަނީ ބައިވެރިވެފައެވެ.

އެމްޑަބްލިޔުއެސްސީން ބުނީ މި ލޭ ހަދިޔާކުރުމުގެ މިޙަރަކާތަކީ ސަރުކާރުން އިސްނަގައިގެން ކުރިއަށް ގެންދަވާ ޤައުމީ ލޭ ހަދިޔާކުރުމުގެ ކެމްޕޭނުގެ ދަށުން ހިންގުނު ޙަރަކާތެއް ކަމަށެވެ.  މިނިސްޓްރީ އޮފް ހެލްތުގެ އިސްނެގުމާއެކު އެކުންފުނީގެ އިޖްތިމާޢީ ޒިންމާގެ ދަށުން ކުރިއަށް ގެންދިޔަ ލޭ ހަދިޔާ ކުރުމުގެ މިޙަރަކާތުގެ އެންމެ މުހިންމު މަޤްސަދަކީ މޯލްޑިވްސް ބްލަޑް ސަރވިސް އަށް ރޯދަމަހާ ދިމާކޮށް ލޭ ލިބުމުގައި ކުރިމަތިވާ ދަތިކަމަށް އެހީތެރިކަން ފޯރުވައި ބޭނުންވާ ލޭގެ އެހީ، އެމްޑަބްލިޔުއެސްސީގެ ފަރާތުން ފޯރުކޮށްދިނުން ކަމަށް އެކުންފުނިން ބުންޏެވެ.  އަދި ކުންފުނީގެ މުވައްޒަފުން ބުރަކޮށް އުޅެމުންވެސް ފަސޭހަ މާހައުލެއްގައި މިފަދަ އިޖުތިމާޢީ އަދި ބޭނުންތެރި ހަރަކާތެއްގައި ބައިވެރިވެ، ލޭ ހަދިޔާ ކުރުމުގެ ފުރުސަތު ތަނަވަސްކޮށްދިނުމުގެ ގޮތުން މި ހަރަކާތުގައި ބައިވެރިވާން ނިންމިކަމަށްވެސް އެމްޑަބްލިޔުއެސްސީ އިން ބުނެފައި ވެއެވެ. 

Advertisement

މުޖުތަމައުގެ ލާބައާއި މަންފާއަށް ކުރެވޭ މިފަދަ ކަންކަމުގައި ބޭނުންވާ އެހީތެރިކަން ފޯރުކޮށްދިނުމަށް އެކުންފުނީގެ މުވައްޒަފުން އިސްނަގައި އަބަދުވެސް ދެމުން އަންނަ އެއްބާރުލުން ފާހަގަކޮށް، އެމްޑަބްލިޔުއެސްސީ އިން ވަނީ މުވައްޒަންނަށް އެކަމަށްޓަަކައި ޝުކުރު އަދާކޮށްފައެވެ.