މަޖިލީހުގެ ކައުންސެލް ޖެނެރަލް ފިލްޒާ، މަޖިލީހުގެ ޖުޑިޝަރީ ކޮމިޓީއަށް ދެއްވި ލަފަޔަށް ގޮތެއް ނުނިންމަވައި ސްޕްރީމް ކޯޓުގެ ފަނޑިޔާރުން މަދުކުރާ ބިލް މަޖިލީހުގެ ތަޅުމަށް ފޮނުވުމުން އިދިކޮޅު އެމްޑީޕީ މެންބަރުން ނުރުހުން ފާޅުކޮށްފިއެވެ. 

ފަނޑިޔާރުން މަދުކުރާ ބިލް، މަޖިލީހުން ބަލައިގަނެ، އިއްޔެ ހަވީރު ޖުޑިޝަރީ ކޮމިޓީން އެ ބިލް ފާސްކޮށްފައި ވަނިކޮށް ފިލްޒާ ވަނީ، އެ ބިލާމެދު ކަންބޮޑުވުން ފާޅުކުރައްވައި، ބިލަށް ލަފާ އަރުވާފައެވެ. 

އެގޮތުން، ގާނޫނުގައިވާ ގޮތް ސާފުކޮށް ބަޔާންކޮށް ދެއްވަމުން ފިލްޒާ ވިދާޅުވީ ފަނޑިޔާރަކު މަގާމުން ވަކިކުރުމުގެ މަރުހަލާ ފެށެނީ ފަނޑިޔާރެއްގެ ސުލޫކީ މައްސަލައެެއް ޖޭއެސްސީއަށް ހުށަހެޅިގެން ނުވަތަ އެފަދަ ޝަކުވާއެއް ނުވަތަ ތުހުމަތެއް ޖޭއެސްސީއަށް ހިސާބަށް އައުމުން ކަމަށެވެ. މިވަގުތު އެފަދަ ހާލަތެއް ނެތް ކަން ވެސް ފާހަގަ ކުރެއްވި އެވެ.

Advertisement

އެ ލަފާއަށް ފަހު އަލުން ރޭ 10:15 ކަންހާއިރު ބޭއްވި ޖުޑިޝަރީ ކޮމިޓީގެ ބައްދަލުވުމުގައި ކޮމެޓީން ނިންމީ ވޯޓަށް އަހާށެވެ. ފުރަތަމަ ވޯޓަށް އެހީ ބިލް އޮތްގޮތަށް ފާސްކުރަން ފެނޭތޯ އެވެ. ކޮމެޓީ މެންބަރުންގެ އިއްތިފާގުވީ ދެވަަނަ ފަހަރަށް ވެސް ބިލް ފާސްކުރުމަށެވެ.

މި ބައްދަލްވުމުގައި ބިލް ފާސްކުރަން ޕީއެންސީގެ ހުރާ ދާއިރާގެ މެންބަރު އަނާރާ ނައީމްއާ އެމްޑީޕީގެ ދެ މެންބަރުން ވޯޓް ނުދެއްވި ނަމަވެސް ބިލް އޮތް ގޮތަށް ފާސްކުރީ ދެން ތިއްބެވި ޕީއެންސީގެ ހުރިހާ މެންބަރުންގެ ވޯޓާ އެކު އެވެ.

އެއަށްފަހު، މިއަދުގެ މަޖިލީހުގައި ބިލަށް ބަހުސް ކުރުން ކުރިއަށް ގެންދިޔުމަށް ހުޅުވާލުމުން، އިދިކޮޅު އެމްޑީޕީ މެންބަރުން ވަނީ އެކަމާ ނުރުހުން ފާޅު ކުރައްވާފައެވެ. 

އެގޮތުން، ކެންދޫ ދާއިރާގެ މެންބަރު މައުރޫފް ޒާކިރު ވަނީ، ރޭގެ ކޮމިޓީގެ ބައްދަލުވުމުގައި، ކައުންސެލް ޖެނެރަލްގެ ލަފާފުޅާއި ގުޅޭ ގޮތުން މަޖިލީހުގެ ތަޅުމުގައި ގޮތެއް ނިންމަން ނިންމާފައިވާ ކަމަށާ، އެނިންމުން ނުނިންމައި ބިލަށް ބަހުސް ކުރުން ނުވަތަ އިސްލާހު ހުށަހެޅުންވެސް ކުރިއަށް ނުގެންދެވޭނެ ކަމަށް ވިދާޅުވެފައެވެ.

އެމްޑީޕީ އެހެން މެންބަރުންވެސް ކައުންސެލް ޖެނެރަލްގެ ލަފަޔަށް ބެއްލެވުމަށް ގޮވާލައި މަޖިލީހުގެ ތަޅުމުގައި ވަނީ އަޑުގަދަ ކޮށްފައެވެ. އެއާއެކު އެ މެންބަރުންގެ ނަން އިއްވައި ވަނީ މަޖިލީހުން ބޭރުކޮށްފައެވެ.