ސުޕްރީމް ކޯޓުގައި ތިއްބެވި ހަތް ފަނޑިޔާރުންގެ ތެރެއިން ދެ ފަނޑިޔާރުން ވަކިކޮށް ފަނޑިޔާރުންގެ އަދަދު ފަހަކަށް މަދުކުރުމަށް ރައްޔިތުންގެ މަޖިލީހަށް ވެރިކަން ކުރާ ޕީއެންސީން ހުށަހަޅައިފައިވާ ބިލު މަޖިލީހުގެ ތަޅުމުން މިއަދު ފާސްކޮށްފިއެވެ.

މި ބިލު އިއްޔެ މަޖިލީހަށް ހުށަަހަޅުއްވައި، ބަލައިގަނެ، ޖުޑީޝަރީ ކޮމިޓީއަށް ފޮނުވައި، ކޮމިޓީން ފާސްކޮށް، މިއަދުވަނީ ގޮތެއް ނިންމަން ތަޅުމަށް ފޮނުވައި ވޯޓަށް 9:45 އެޖެންޑާ ކޮށްފައެވެ.

އެއާއެކު އެމްޑީޕީ މެންބަރުން ވަނީ ކައުންސެލް ޖެނެރަލް ބިލާމެދު ކަންބޮޑުވުން ފާޅުކުރައްވައި ލަފާއަރުއްވާފައި ވަނިކޮށް އެއާމެދު ގޮތެއް ނުނިންމައި ބިލް ފާސްނުކުރެވޭނެ ކަމަށް ވިދާޅުވެ މަޖިލީހުގެ ތަޅުމުގައި އަޑުގަދަ ކޮށފައެވެ. އަދި، މަޖިލީހުގެ ރިޔާސަތުގެ ކުރިމައްޗަށް މެންބަރުން އެއްވެ ވަނީ އަޑު ގަދަ ކުރައްވާފައެވެ.

Advertisement

މެންބަރުން އެފަދައިން ކަންކުރައްވަން ފެއްޓެވުމުން، ރިޔާސަތުގައި އިންނެވި އަބްދުއްރަހީމް އަބްދުالله ވަނީ މެންބަރުންނަށް ނަސޭހަތްތެރިވެ، ގޮނޑިކޮޅުގައި ތިއްބެވުމަށް އެދިވަޑައިގެންފައެެވެ. ނަމަވެސް، މަޖިލީހުގެ ރައީސްގެ އެންގެވުމާ އެއްގޮތަށް އަމަލުނުކުރެއްވުމުން، ރިޔާސަތުން ވަނީ ގަލޮޅު ދެކުނު ދެކުނު ދާއިރާގެ މެންބަރު މީކާއިލް ނަސީމާއި، ވައިކަރަދޫ ދާއިރާގެ މެންބަރު ހުސައިން ޒިޔާދާއި، ކެންދޫ ދާއިރާގެ މެންބަރު މައުރޫފް ޒާކިރުގެ ނަން އިއްވައި އެ މެންބަރުން ތަޅުމުން ނެރެފައެެވެ.

އެފަހުން، ގާތްގަނޑަކަށް 10:00 ކަންހާއިރު ބިލަށް ވޯޓަށް އަހާފައިވާއިރު، މަޖިލީހުގެ އިލެކްޓްރޯނިކް ވޯޓިން ސިސްޓަމަށް މައްސަލައެއް ދިމާވެގެން، ވޯޓަށް އެހީ، ކޮންމެ މެންބަރެއްގެ ނަން ވަކިން އިއްވުމަށް ފަހު، ފެންނަ ނުފެންނަ ކަމަށް ވަކިވަކިން މެންބަރުން އަރިހުން އައްސަވައިގެންނެވެ.

އެއާއެކު ޕީއެންސީގެ މެޖޯރިޓީ މެންބަރުންގެ ތާއިދާއެކު ބިލްވަނީ މަޖިލީހުން ފާސްކޮށްފައެވެ. 

އެގޮތުން، ވޯޓުގައި ބައިވެރިވި 77 މެންބަރުންގެބތެރެއިން ބިލް ފާސްކުރަން ފެންނަ ކަމަށް 68 މެންބަރުން ވޯޓުދެއްވިއިރު، ބިލް ފާސް ކުރަން ނުފެންނަ ކަމަށް ވޯޓު ދެއްވީ 9 މެންބަރުންނެވެ.