މަތީކޯޓްގެ ފަނޑިޔާރުން މަދުކުރުމުގެ ބިލަށް ވޯޓް ނުދެއްވި ނަމަވެސް ހުންނެވީ ސަރުކާރާއެކު ކަމަށް ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު ވިދާޅުވެއްޖެ އެވެ.
ސަރުކާރުން ވަނީ ސުޕްރީމް ކޯޓްގެ ފަނޑިޔާރުންގެ އަދަދު ހަތަކުން ފަހަކަށް މަދު ކުރަން ގާނޫނަށް ބަދަލު ގެނެސްފަ އެވެ. ގާނޫނަށް ބަދަލު ގެނައީ މަޖިލީހުގައި އޮތް ސުޕަ މެޖޯރިޓީ ބޭނުންކޮށްގެން ވަރަށް އަވަސް އަރުވާލައިގެންނެވެ. ބިލް މަޖިލީހަށް ހުށައެޅިތާ 24 ގަޑިއިރުގެ ތެރޭ ގާނޫނަށް ވަނީ ބަދަލު ގެނެސްފަ އެވެ.
އެކަމާއި ދެކޮޅަށް ޕީއެންސީން ތެދުވި ހަމައެކަނި މެންބަރަކީ އަޒާން އެވެ. އެ ކަމާއި ގުޅިގެން ޕީއެންސީގެ މަޖިލީސް މެންބަރުންނަށް ހާއްސަ ގުރޫޕުތަކުން އަޒާން ވަނީ ބޭރުވެސް ކޮށްފަ އެވެ.
ބަޔާނެއް ނެރެ އަޒާން މިއަދު ވިދާޅުވީ އެ ގާނޫނަށް ބަދަލު ގެނައުމަށް ވޯޓް ނުދެއްވީ އެއީ ގާނޫނު އަސާސީއާ ހިލާފު ކަމަކަށް ވާތީ ކަމަށެވެ. އަދި އެ ގާނޫނަށް ވޯޓް ނުދެއްވުމަށް ކެބިނެޓް މިނިސްޓަރުންނާއި ދައުލަތަށް ހިދުމަތް ކުރައްވާފައިވާ ބައެއް ބޭފުޅުންނާއި ޝަރުއީ ދާއިރާގައި މަސައްކަތް ކުރައްވާ ބޭފުޅުންނާއި ގާނޫނީ ވަކީލުން ވެސް މަޝްވަރާ ދެއްވާފައިވާ ކަމަށެވެ.
އަދި ކޯޓްތަކާ ބެހޭ ގާނޫނަށް ބަދަލު ގެނެސް ދެ ފަނޑިޔާރަކު މަގާމުން ވަކިކުރަން ނިންމުމަކީ ދެކޮޅު ޖެހޭ ކަމެއް ކަމަށް ނުވާތީ ކަމަށް ވެސް ވިދާޅުވި އެވެ.
ނަމަވެސް އަޒާން ވިދާޅުވީ އަދިވެސް އޭނާ ހުންނެވީ މި ސަރުކާރާ އެެކު ކަމަށެވެ.
"ހާއްސަކޮށް އައްޑޫސިޓީއަށް ތަރައްގީ ހޯދައި ދިނުމަށް ކުރަން ޖެހުނު ހުރިހާ މަސައްކަތެއް ކުރަން. ކޯޓްތަކުގެ ގާނޫނަށް ހުށައެޅި އިސްލާހަށް ތާއީދުނުކުރީ އެ އިސްލާހަކީ ގާނޫނު އަސާސީއާ ހިލާފު އިސްލާހެެއް ކަމަށް އަޅުގަނޑަށް ފެންނާތީ," އަޒާން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
