ބަރަކާތްތެރި ރަމަޟާން މަސް އަޅުގަނޑުމެންނާއި މި ވަނީ ބައްދަލު ކޮށްފަ އެވެ. ރޯދައިގެ މި މޫސުން އަޅުގަނޑުމެންނާއި ބައްދަލު ކުރަނީ އަހަރަކު އެއް ފަހަރު އެވެ.

ރޯދައަށް ހުންނަ ހުރުމުގައި ބައެއް ފަހަރު ހަނދާން ނެތިގެން އެއްޗެއް ކެވޭ ގޮތް ވެ އެވެ. ނުވަތަ އެއްޗެއް ބޮވޭ ގޮތް ވެދާނެ އެވެ. އެ ހާލަތުގައި ދެން ހަދާނީ ކިހިނަކުން ހެއްޔެވެ. ރޯދަ ފުރިހަމަ ކުރާނީ ހެއްޔެވެ. ނުވަތަ ރޯދަ ދޫކޮށްލާނީ ހެއްޔެވެ. ފަހުން އެ ރޯދަ ގަލާ ކުރާނީ ހެއްޔެވެ.

ދިވެހީންގެ ދީނީ ހޭލުންތެރިކަމަށް ވަރަށް މުހިންމު މަސައްކަތްތަކެއް ކުރާ އިލްމު ޖަމިއްޔާގެ ސޯޝަލް މީޑިއާ ޕްލެޓް ފޯމުން އިއްޔެ ގެނެސް ދިން ވީޑިއޯއެއްގައި އެ މައްސަލައަށް ވަނީ އަލިއަޅުވާލާފަ އެވެ. ސުވާލަކީ ރޯދައަށް ހުއްޓާ ހަނދާން ނެތިގެން މީހަކަށް ދެ ތަށި ފެން ބޮވުނީ އެވެ. ރޯދައަށް ހުރިކަން ހަނދާން ވީ ދެ ތަށި ފެން ބޮއެ ނިންމި ފަހުންނެވެ.

ޝެއިހް އާޒިމް ޚާލިދު ވިދާޅުވި ގޮތުގައި އެ ހާލަތުގައި ރޯދައަށް އެއްވެސް އަސަރެއް ނުުކުރާނެ އެވެ. އެކަން ނަބިއްޔާގެ ބަސްފުޅުތަކުން އެނގޭ ކަމަށް ވިދާޅުވި އެވެ.

"އެއީ ކީރިތި ރަސޫލާ ހަދީސް ކުރައްވަނީ ރޯދައަށް މީހަކު ހުންނަ ދުވަހެއްގައި އޭނައަށް ހަނދާން ނެތިގެން ކެއުނީ ނުވަތަ ބޮވުނީ އެހެން ވެއްޖިއްޔާ .. އެ މީހަކަށް މާތްﷲ ކާންދެއްވިއްޔޭ ނުވަތަ ބޯން ދެއްވިއްޔޭ. އެހެންވީމަ ހަނދާން ނެތިގެން އެއްޗެއް ކެވުނީ ނުވަތަ ބޮވުނީ އެހެން ވިޔަސް އެ ދުވަހުގެ ރޯދަ އެ މީހަކު ފުރިހަަމަ ކުރާނީ,"

އެހެން ކަމުން ހަނދާން ނެތި އެއްޗެއް ކެވުނު ނަމަވެސް އަދި ބޮވުނު ނަމަވެސް ރޯދައަށް އަސަރެއް ނުކުރާނެ އެވެ. ހަނދާންވުމުން އަަވަހަށް ހުއްޓާލާނީ އެވެ.