ރާއްޖޭގައި ވަޒީފާ އަދާކުރާ ބިދޭސީންގެ ބައޯމެޓްރިކްސް އަޕްޑޭޓްކުރުން އަވަސްކުރަން މާލެ އާއި ހުޅުމާލެއިން ދެ ސްކޫލު ހަމަޖައްސައިފި އެވެ.
ދާޚިލީ ޚިދުމަތްތަކާ ބެހޭ ވުޒާރާއިން މިއަދު ބުނީ ބިދޭސީންގެ ބައޯމެޓްރިކްސް އަޕްޑޭޓްކުރުމަށް އެންސީއައިޓީގައި ގާއިމުކޮށްފައިވާ ޖޮއިންޓް އޮޕަރޭޝަން ސެންޓަރާއި ނޯތު ހާބަރު ސަރަހައްދުގައި ގާއިމުކޮށްފައިވާ ޑެސްކްގެ އިތުރުން ކަލާފާނު ސްކޫލް ހޯލުގައި ބައޯމެޓްރިކްސް ނެގުން މިމަހުގެ ނުވަ ވަނަ ދުވަހު ފަށާނެ ކަމަށެވެ.
އެ ގޮތުން ނުވަ ވަނަ ދުވަހުން ފެށިގެން ޝައްވާލު މަހުގެ ހަތްވަނަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:30 އިން ހަވީރު 4:00 އަށް އަދި ރޭގަނޑު 9:30 އިން ރޭގަނޑު 11:30 އަށް ބައޯމެޓްރިކްސް ނެގުން ކުރިއަށްދާނެ ކަމަށް ބުނެފައިވެ އެވެ.
މީގެ އިތުރުން ހުޅުމާލޭގައި މިއަދުން ފެށިގެން ޝައްވާލު މަހުގެ ހަތްވަނަ ދުވަހުގެ ނިޔަލަށް، ހުކުރު ދުވަސް ފިޔަވައި ރޭގަނޑު 9:30 އިން ރޭގަނޑު 12:30 އަށް ހުޅުމާލޭ ފޭސް 1 ގެ ރެހެންދި ސްކޫލު ހޯލުގައި ބައޯމެޓްރިކްސް ނެގުމުގެ އިންތިޒާމު ހަމަޖެހިފައިވާ ކަމަށް ވެސް އެ ވުޒާރާއިން ބުނެފައިވެ އެވެ.
ބިދޭސީންގެ ބައޯމެޓްރިކްސް އަޕްޑޭޓްކުރުމުގެ އެންމެފަހު ތާރީހަކީ އެޕްރީލް 20 ވަނަ ދުވަސްކަމުގައި ހޯމްލޭންޑް ސެކިއުރިޓީ މިނިސްޓްރީން ވަނީ މީގެ ކުރިން ބުނެފަ އެވެ.
Advertisement
This content is created and paid for by advertisers and does not involve Voice Journalists
