ކޯޓްގެ ހުރުމަތް ކަނޑާފައިވާ ކަމަށް ބުނެ ބަންޑާރަ ނާއިބު އަހްމަދު އުޝާމަށް ފިޔަވަޅު އަޅައިދިނުމަށް އެދި ކެންދޫ ދާއިރާގެ ކުރީގެ މެންބަރު އަލީ ހުސައިން ހުށައެޅުއްވި މައްސަލައާއި ގުޅިގެން ބަންޑާރަ ނާއިބު އަހްމަދު އުޝާމް, އަލީ ހުސައިނަށް ވަރުގަދައަށް ރައްދު ދެއްވައިފި އެވެ.
އަލީ ހުސައިން އެފަދަ މައްސަލައެއް ހުށައެޅުއްވީ ޕާޓީ ބަދަލުކުރުމުން ގޮނޑި ގެއްލޭ މައްސަލައާ ގުޅިގެން ސުޕްރީމް ކޯޓްގައި އޮތް މައްސަލައަށް ޖަވާބުދާރީވުމަށް ބަންޑާރަ ނާއިބުގެ އޮފީހަށް ދީފައިވާ މުއްދަތުގައި ޖަވާބުދާރީވެފައިނުވާ ކަމަށް ވިދާޅުވެ އެވެ. އެއީ ސުޕްރީމް ކޯޓްގެ އަމުރާ ހިލާފުވެ ކޯޓްގެ ހުރުމަތް ކެނޑުމުގެ އަމަލެއް ކަމަށް ވިދާޅުވެ ބަންޑާރަ ނާއިބުގެ މައްޗަށް ފިޔަވަޅު އަޅުއްވައި ދެއްވުމަށް އެދިފައިވެ އެވެ.
އަލީ ހުސައިންގެ އެ ތުހުމަތަކާއި ހުށައެޅުއްވި މައްސަލައަށް އިޝާރާތް ކުރައްވާ ބަންޑާރަ ނާއިބު އަހްމަދު އުޝާމް ވިދާޅުވީ ފާޅުގައި ސާފުކޮށް ފެންނަން ހުންނަ ކަންކަމުގައި ވެސް އަލީ ހުސައިން ދޮގު ހައްދަވާ އޮޅުވާލެއްވުމުން ނިޔަތް ސާފުވެއްޖެ ކަމަށެވެ.
"ތިކުރާ ކަންތައްތަކަކީ ކޮންމެ ސަބަބަކާ ގުޅިގެން ކުރާ ކަންތަކެއް ނަމަވެސް ފާޅުގަ ފެންނަން ހުންނަ ކަންކަމުގަވެސް ތިވަރަށް ދޮގު ހަދައި އޮޅުވާލުމަކީ ތިމާމީހާގެ ނިޔަތް ސާފުވެގެންދާ ކަމެއް. ތިޔަބުނާ މައްސަލާގައި ސުޕްރީމް ކޯޓުން ދެއްވާފައިވަނީ ރަސްމީ 10 ދުވަހުގެ މުއްދަތެއް. އަދި އެމުއްދަތުގެ ތެރޭގައި އޭޖީ އޮފީހުން ކުރަންޖެހޭ ކަންކަން ވާނީ ކޮށްފައި,"
އަލީ ހުސައިން ވިދާޅުވީ ސުޕްރީމް ކޯޓުން ދީފައިވާ މުއްދަތު ހަމަވަނީ 28 ފެބްރުއަރީ ނޫން ކަމަށެވެ. އަދި ވިދާޅުވީ ރަސްމީ ދުވަސް ގުނަންޖެހޭ ގޮތް ކިޔައިނުދެއްވި ނަމަވެސް އެވަރު އަލީ ހުސައިނަށް އެނގިވަޑައިގަންނަވާނެ ކަމަށް ދެކޭ ކަމަށެވެ.
"މިބަރަކާތްތެރި ރަމަޟާން މަހު ތިޔަފަދަ ދޮގު ވާހަކަތައް ފަތުރައި، ފިތުނަފަސާދަ އުފެއްދުމަށް މަސައްކަތްކުރުމުގެ ބަދަލުގައި ކޮންމެވެސް ހެޔޮ އަމަލެއް ކުރުމުގައި ޝާމިލްވުމަށް ނަސޭހަތްތެރިވަން," އަލީ ހުސައިނަށް ރައްދު ދެއްވާ ކުރެއްވި ޕޯސްޓްގައި ބަންޑާރަ ނާއިބު ވިދާޅުވެފައިވެ އެވެ.
Advertisement
This content is created and paid for by advertisers and does not involve Voice Journalists
