ރައްޔިތުންގެ މަޖިލީސް މެންބަރުން ރާއްޖޭން ބޭރުން ބޭސްފަރުވާ ކުރުމަށް ޚާއްސަ ކާޑެއް ތައާރަފުކުރަން އެލައިޑް އިންޝުއަރެންސްގައި އެދުމަށް މަޖިލީހުގެ އާންމު ކޮމިޓީން ފާސްކޮށްފިއެވެ.
މަޖިލީހުން މީގެ ކުރިން ބޭއްވި އާއްމު ކޮމިޓީ ބައްދަލުވުމުގައި މެންބަރުން ވަނީ ރާއްޖެއިން ބޭރުން ބޭސްފަރުވާ ކުރުމަށް އަމިއްލަ ޖީބުން ފައިސާ ދައްކަން ޖެހި ޖުމްލަ އެ އަދަދު އެލައިޑުން ނުލިބޭކަމަށް ބުނެ ޝަކުވާ ކޮށްފައެވެ.
އެހެންކަމުން އެ މައްސަލަ ހައްލުކޮށް ރީއިބްމާސް ކުރަން ނުޖެހޭ ނިޒާމެއްގެ ތެރެއިން، އިންޝުއަރެންސް ކާޑެއް މެމްބަރުންނަށް ހާއްސަކޮށް ތައާރަފު ކުރުމަށް އެލައިޑްގައި އެދެން، މިދިޔަ ހޯމަ ދުވަހު ބޭއްވި ކޮމިޓީ ބައްދަލުވުމުގައި ފޭދޫ ދެކުނު ދާއިރާގެ މެންބަރު އިބްރާހިމް ދީދީ ވަނީ ހުށަހަޅުއްވާފައެވެ.
އެ ކާޑު ފަރުމާ ކުރުމަށް ނިންމާފައި ވަނީ، ވަކި ލިމިޓެއް ކަނޑައަޅައި އެ ކާޑުން ރާއްޖެއިން ބޭރުގައި ކުރާ ބޭސްފަރުވާއަށް ފައިސާ ދެއްކޭ ގޮތަށެވެ.
އެ ހުށަހެޅުމަށް ހޮޅުދޫ ދާއިރާގެ ޕީއެންސީ މެންބަރު އަބްދުއްސައްތާރު މުހައްމަދު ތާއީދުކުރެއްވިއިރު، ހުށަހެޅުން ފާސްވީ ކޮމިޓީއަށް ހާޒިރުވެވަޑައިގެންނެވި އަށް މެންބަރުންގެ ތާއިދާއެކުގައެވެ.
މީގެ އިތުރުން ކޮމިޓީ ބައްދަލުވުމުގައި ވާހަކަދައްކަވަމުން މެންބަރު އިބްރާހީމް ދީދީ ވަނީ، ހެލްތު އިންޝުއަރެންސް އެލައިޑަށް އިތުރު މުއްދަތަކަށް ދޭން ހުށަހެޅުއްވުމަށް ތާއީދު ކުރައްވާފައެވެ. އަދި ދައުލަތުގެ ބަޖެޓަށް އިތުރު 'ބާރެއް' ނާރާނެ ގޮތަށް މެންބަރުންނަށް މިހާރު ވެސް ލިބެމުންދާ އިންޝުއަރެންސް ހަރުދަނާކުރަންޖެހޭ ކަމަށް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
