ނިމިދިޔަ ހަތް ދުވަހު ކަރަންޓް ބޭނުންކުރި މިންވަރަށް ބަލާއިރު ކަރަންޓް ބޭނުންކުރުން ބައެއް ވަގުތުތަކުގައި ވަރަށް މަތީ ނިސްބަތަކަށް އިތުރުވާކަން ފާހަގަކޮށް ކަރަންޓް އިގްތިސާދު ކުރުމަށް ހާއްސަ ސަމާލު ކަމެއް ދިނުމަށް ކަރަންޓް ކުންފުނިން އެދިއްޖެ އެވެ.

ސްޓެލްކޯ އިން މިރޭ ވަނީ މި ރޯދަ މަހުގެ ފުރަތަމަ ހަތް ދުވަހު ކަރަންޓް ބޭނުންކުރި މިންވަރު ދައްކުވައިދޭ ގްރާފެއް ހިއްސާކޮށް ކަރަންޓް އިގްތިސާދު ކުރުމަށް އިލްތިމާސްކޮށްފަ އެވެ.

‏އެ ކުންފުނިން ބުނީ ރޯދަ މަހުގެ ފުރަތަމަ ހަތް ދުވަހު މާލެއާއި ހުޅުމާލޭގައި ކަރަންޓު ބޭނުންކުރެވިފައިވާ ގޮތަށް ބަލާއިރު، އެއް ޕެޓާންއަކަށް ކަރަންޓު ބޭނުން ކުރެވެމުންދާކަން ފާހަގަ ކުރެވޭ ކަމަށެވެ. އެގޮތުން ރޭގަނޑު 12 އިން ފެށިގެން ހެނދުނު ހަޔަކާއި ހަމައަށް ކަރަންޓު ބޭނުން ކުރާ މިންވަރު ދަށްވެ، ހެނދުނު ހަޔަކުން ނުވައެއް ޖެހުމާއި ހަމައަށް އެއްހަމައެއްގައި މަތިވަމުންގޮސްފައިވާ ކަމަށެވެ.

Advertisement

ކަރަންޓް ބޭނުންކުރި މިންވަރު ދައްކައިދޭ ޗާޓް

އަދި ބުނީ ހެނދުނު ނުވަޔަކުން ފެށިގެން މެންދުރު އެކަކާއި ހަމައަށް، މި ގަޑިތަކަކީ ހޫނު ގަދަވަމުންދާ ގަޑިތަކަކަށްވުމުގެ އިތުރުން، އެއީ އޮފީސް ގަޑިއަށްވުމާއެކު ކަރަންޓު ބޭނުން ކުރަމުންދާ މިންވަރު އިތުރުވަމުންދާކަން ފާހަގަ ކުރެވިފައިވާ ކަމަށެވެ.

މެންދުރު އެކަކާއި ހަވީރު ފަހަކާއި ދެމެދު، ހޫނުވުމުގެ އިތުރުން، މިއީ ރޯދަ މަސް ކަމުން މި ވަގުތަކީ ބަދިގޭގެ އެޕްލަޔަންސްތައް ގިނައިން ބޭނުންކުރާ ވަގުތަކަށް ވާތީ ކަރަންޓު ބޭނުންކުރާ މިންވަރު މި ގަޑިތަކުގައި އިތުރު ކަމަށް ފާހަގަ ކުރެވޭ ކަމަށް ބުންޏެވެ.

މީގެ އިތުރުން ހަވީރު ފަހަކުން ފެށިގެން ރޭގަނޑު ހަތެއް ޖެހުމާއި ހަމައަށް ކަރަންޓު ބޭނުން ކުރާ މިންވަރު ދަށް ނަމަވެސް، އޭގެ ފަހުން ދަންވަރު 12 ޖެހުމާއި ހަމައަށް މެންދުރުގެ ލޯޑާއި އެއްވަރެއްގައި ކަރަންޓު ބޭނުން ކުރަމުންދާކަން ވަނީ ފާހަގަ ކުރެވިފައި ކަމަށް ކަރަންޓް ކުންފުނިން ބުންޏެވެ.

“އެހެން ކަމުން ކަރަންޓު ބޭނުން ކުރާ މިންވަރު އިތުރުކަމަށް ފާހަގަ ކުރެވިފައި މިވާ ގަޑިތަކުގައި ކަރަންޓު އިގްތިޞާދު ކުރުމަށް ޚާއްސަ ސަމާލުކަމެއް ދިނުމަށް އިލްތިމާސްކުރަން،” ސްޓެލްކޯ އިން ބުންޏެވެ.