އިންޑިއާއިން ދިވެހިރާއްޖެއަށް ގެންނަން އުޅުނު 3.7 މިލިއަން ޑޮލަރު (58 މިލިއަން ރުފިޔާ) މަސްތުވާތަކެތި އިންޑިއާ ކޯސްޓް ގާޑާއި ޑައިރެކްޓަރޭޓް އޮފް ރެވެނިއު އިންޓެލިޖެންސް (ޑީއާރްއައި) ގުޅިގެން ހިންގި އޮޕަރޭޝަނެއްގައި ހިފަހައްޓައިފިއެވެ.
އިންޑިޔާގެ ދަ ހިންދޫ ޓައިމްސް އިން ރިޕޯޓްކޮށްފައިވާ ގޮތުގައި ޑީއާރްއައިން ދިން މަޢުލޫމާތެއްގެ މައްޗަށް ބިނާކޮށް، ތޫތުކުޑީން މާލެއަށް ދަތުރުކުރަމުންދިޔަ ކުޑަ އުޅަނދެއްގައި މަސްތުވާތަކެތި ހުރި ކަމަށް ޝައްކު ކުރެވިގެން އިންޑިއާ ކޯސްޓް ގާޑުގެ ދެ އުޅަނދެއް ފޮނުވައި، މާރޗް 5 ވަނަ ދުވަހުގެ ރޭ 8:00 ހާއިރު ގަލްފް އޮފް މަންނާރުގެ ދެކުނުން އެ އުޅަނދު ހުއްޓުވާފައިވާ ކަމަށެވެ.
އަދި ކޯސްޓް ގާޑުގެ އޮފިޝަލުން އެ އުޅަނދަށް އަރައި، އުޅަނދުގައި ތިބި ފަޅުވެރިން ހައްޔަރުކުރި ކަމަށާ އިތުރަށް ބަލައި ފާސްކުރުމަށްޓަކައި އެ އުޅަނދު ތޫތުކުޑީ ބަނދަރަށް ގެންދެވުނު ކަމަށެވެ.
އެ އުޅަނދު ބަލައި ފާސްކޮށް ފެނުނު މަސްތުވާތަކެތި ޓެސްޓުކުރިއިރު، އެ ހަޝިޝް އޮއިލްކަން ކަށަވަރުވެފައުވާ ކަމަށާ، އޭގެ ބަރުދަނުގައި 30 ކިލޯ ހުރިކަމަށް ރިޕޯޓްކޮށްފައިވެއެވެ. މީގެ އަގު ބައިނަލްއަޤްވާމީ މާކެޓުގައި 3.7 މިލިއަން ޑޮލަރަށް އަރާ ކަމަށް ލަފާކޮށްފައިވެއެވެ.
އެ ނޫހުން ރިޕޯޓް ކުރި ގޮތުގައި، އެ އުޅަނދުން 9 ފަޅުވެރިން ހައްޔަރު ކުރެވުނު ކަމަށާ، އެމީހުން ޑީއާރްއައިގެ ހަވާލުގައި ވަނީ ދޫކޮށްލާފައެވެ.
މި މައްސަލައާ ގުޅޭ އިތުރު ތަޙްޤީޤުތައް ކުރިއަށްދާ ކަމަށް އިންޑިއާގެ ކަމާބެހޭ ފަރާތްތަކުން މައުލޫމާތު ދީފައިވެއެވެ.
Advertisement
This content is created and paid for by advertisers and does not involve Voice Journalists
