ދަރަންޏެއް ސާބިތުުވުމާއި ގުޅިގެން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުޙައްމަދު ސިނާންގެ ގޮނޑިއާ މެދު ގޮތެއް ނިންމުމަށް ސުޕްރީމް ކޯޓަށް ހުށައެޅި މައްސަލަ އެ ކޯޓުން ބަލައިގެންފި އެވެ.

ހިތަދޫ މެޖިސްޓްރޭޓް ކޯޓުން މީގެ އަހަރެއް ކުރިން ވަނީ ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ މެންބަރު, ސިނާންއާއެކު އަހުމަދު ވަހީދާއި މުހައްމަދު ސަލީމް، މޯލްޑިވްސް އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް ނުދައްކާ އޮތް މައްސަލައެއް ބަލާފައެވެ. 

މި ތިން މީހުންނާ ދެކޮޅަށް ހިތަދޫ މެޖިސްޓްރޭޓް ކޯޓުގައި ނިމިދިޔަ އަހަރުގެ ޖުލައި 21 ގައި އެމްއައިބީން ކުރި ދައުވާ, އެ އަހަރުގެ އޮކްޓޯބަރު މަހުގެ 14 ވަނަ ދުވަހު ވަނީ ނިންމާފަ އެވެ. މައްސަލަ ނިމުނީ އެމްއައިބީ ކޮޅަށެވެ.

ކޯޓުން ވަނީ ނުދެއްކި ހުރި ލޯނު ދެއްކުމާއި ޖޫރިމަނާގެ ފައިސާ 6 މަސް ދުވަހުގެ ތެރޭގައި އެމްއައިބީއަށް ދެއްކުމަށް ހުކުމް ކޮށްފައެވެ. 

އެ ފައިސާ ނުދައްކާ އޮތުމުން ވަކީލު ގާލިބު ސަލީމް ވަނީ އެ މައްސަލަ ސުޕްރީމް ކޯޓަށް ހުށައަޅާފަ އެވެ. ގާލިބު މިއަދު ވިދާޅުވީ މައްސަލަ ބަލައިގަނެ އެކަން މިއަދު އަންގާފައިވާ ކަމަށެވެ.

ނަަމަވެސް މައްސަލަ ހުށައަޅާފައި ވަނިކޮށް ސިނާން ވަނީ އެއް ފަހަރާ އެ ފައިސާ ދައްކާ ދަރަނި ހަލާސް ކޮށްފަ އެވެ.

ގާނޫނު ބުނާ ގޮތުގައި މަޖިލީސް މެންބަރެއް އިންތިހާބުގެ ކުރިން ނުވަތަ މެންބަރުކަމަށް ވަޑައިގަތުމަށްފަހު ދަރަންޏެއް ނުދައްކާހުރިނަމަ އެ މެންބަރެއްގެ ގޮނޑި ގެއްލޭނެއެވެ. ނިމިދިޔަ އޭޕްރީލްގައި ބޭއްވި މަޖިލިސް އިންތިހާބުގައި ހިތަދޫ އުތުރު ދާއިރާގެ ގޮނޑި ސިނާން ކާމިޔާބު ކުރީ އެމްޑީޕީ ކެންޑިޑޭޓް މުހައްމަދު އަސްލަމްގެ މައްޗަށް ކުރި ހޯދައިގެންނެވެ.