މިއަދު ކުޅުނު ސޮކަ ވެޓަރަންސް މެޗްގައި ފުޓްބޯޅަ ލެޖެންޑް ޝާހް އިސްމާއީލް (ސާޔާ)ގެ އަތް ބިންދައިގެން ހިނގައްޖެއެވެ.

ސާޔާގެ ކަނާއަތް ބިންދައިގެން ދިޔައީ މިއަދު ހަވީރު ހެންވޭރު ދަނޑުގައި ކްލަބް ވެލެންސިއާ ކުޅުނު މެޗެއްގައެވެ. ވޮއިސްއާ މައުލޫމާތު ހިއްސާކުރަމުން އެވަގުތު ދަނޑުގައި ހުރި ކުރީގެ އެއްވަނަ ފޯވަޑް އަލީ ޝިހާމް ބުނީ، ސާޔާގެ އަތްބިންދައިގެން ދިޔައީ އިދިކޮޅު ޓީމްގެ ކުޅުންތެރިއަކު ކުރި ޓެކްލަކާ ގުޅިގެން ކަމަށެވެ. 

"ބޮޑަށް ލަފާކުރެވެނީ ބިންމައްޗަށް ވެއްޓި އަތްޖެހުނު ގޮތަކުންކަމަށް އެގޮތަށް ބިންދައިގެން ދިޔައީ. މިއީ ވަރަށް ދެރަކޮށްވީކަމެއް" ހުރާ އައްޔަ ބުންޏެވެ. 

Advertisement

ސާޔާގެ އަތް އަނިޔާވުމާއެކު އޭނާ ވަނީ އޭޑީކޭއަށް ގެންގޮސް ފަރުވާދީފައެވެ. ހުރާ އައްޔަ ވަނީ ސާޔާގެ އަތުގެ އެކްސްރޭގެ ފޮޓޯއެއް އޭނާގެ ފޭސްބުކް އެކައުންޓުގައި ހިއްސާކޮށްފައެވެ. 

ސާޔާ އަތުގެ އެކްސްރޭ

ކްލަބް ވެލެންސިއާ އަކީ ޝާހް އިސްމާއީލްގެ ފުޓްބޯޅަ ކެރިއަރުފެށި ކްލަބެވެ. ނަމަވެސް ސާޔާގެ ކެރިއަރުގެ ބޮޑުބައެއް ހޭދަކުރީ ވެލެންސިއާ އާ ވާދަވެރި ނިއުރޭޑިއަންޓް ސްޕޯޓްސް ކްލަބާއެކުގައެވެ. ސާޔާ ވަނީ ރާއްޖޭގެ ޤައުމީ ޓީމުގެ ކެޕްޓަނެއްގެ ގޮތުގައިވެސް ފެނިގެންގޮސްފައެވެ. އޭނާގެ ކެޕްޓަންކަމުގެ ދަށުން ސާފް ޗެމްޕިއަންޝިޕް 2003ގެ ފައިނަލަށް ދިވެހިރާއްޖެ ދަތުރުކުރިއެވެ. ސާޔާ އަކީ ގޯލާ ވަރަށް ރައްޓެހި ކުޅުންތެރިއެކެވެ. 

ރާއްޖޭގެ އެންމެ މޮޅު ކުޅުންތެރިޔާގެ މަޤާމް ހޯދި ސާޔާ ފުޓްބޯޅަދަނޑުން ރިޓާޔާ ކުރުމަށްފަހު ފެނިގެންގޮސްފައިވަނީ ފުޓްބޯޅައިގެ އިދާރީ މަސައްކަތްތަކުންނެވެ.