"ޙޫރުލް ޢީނުންގެ ވާހަކަ އަކީ" އަކީ އެއްވެސް ޙަޤީޤަތެއް ނެތް ބޭކާރު ވާހަކައެއް ކަމަށް ބުނެ އެގޮތަށް ވާހަކަ ދައްކާ މީހަކު އެވަނީ، الله އާއި އެއިލާހުގެ ރަސޫލާ މުޙައްމަދު ﷺއަށް އަދި ކީރިތި ޤުރްއާނަށްވެސް ކާފަރުވެފައި ކަމަށް ދީނީ ޢިލްމުވެރިޔާ އައްޝައިޚް އާދަމް ނިޝާން ވިދާޅުވެއްޖެއެވެ.
ޝެއިހް ނިޝާން މިހެން ވިދާޅުވެފައިމިވަނީ، ރާއްޖޭގެ ފަތުވާ ކޮމެޓީން ދައްކަނީ “ހޫރައްލީނުން” ގެ ވާހަކަ ކަހަލަ ބޭކާރު ވާހަކަ ކަމަށް ވިދާޅުވެ އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް ކުފުރުގެ ވާހަކަތަކެއް ދެއްކުމާއި ގުޅިގެންނެވެ.
އެގޮތުން، ރާއްޖެޓީވީގެ ޕްރަގްރާމެއްގައި ވާހަކަ ދައްކަމުން ރޮޒައިނާ ކަންބޮޑުވުން ފާޅުކުރީ ސުޕްރީމް ކޯޓްގެ ފަނޑިޔާރުން ސަސްޕެންޑް ކުރި މައްސަލާގައި ފަތުވާ ކޮމެޓީން ވާހަކަ ނުދައްކާ ކަމަށް ބުނެ އެވެ. އަދި ވިދާޅުވީ ފަތުވާ ކޮމެޓީން ރައްޔިތުންނަށް މުހިންމު ކަންކަމުގައި ވާހަކަ ނުދައްކާ ކަމަަށެވެ. އަދި މުޅީން ވެސް ފެންނަނީ ބޭކާރު ކަންކަމުގައި ފަތުވާ ނެރޭ ތަން ކަމަށެވެ.
މިސާލެއްގެ ގޮތުން ވިދާޅުވީ ހޫރައްލީނުން ފަދަ ވާހަކަތަކެވެ. އަދި އެއީ ބޭކާރު ވާހަކަތަކެއް ގޮތުގައި ސިފަ ކޮށްފައިވެ އެވެ.
“ހޫރައްލީނުންގެ ވާހަކަތަކާއާ މިކަހަލަ ކޮންމެވެސް ބޭކާރު ވާހަކަތަކެއްގެ ތެރޭގައި އަބަދު ތިބެގެން އެންމެ ރައްޔިތުންނަށް ހޯދައިދޭން ޖެހޭ ހައްގުތައް ހޯދައިނުދެވި ދިޔައީމަކާ އަޅުގަނޑަކަށް ހިއެއް ނުވޭ އެބޭފުޅުންގެ ވެސް ޒިންމާ އަދާކުރެވޭ ހެނެއް،”
ރޮޒައިނާ އާދަމް
ރޮޒައިނާއަށް ރައްދު ދެއްވައި ޝެއިޚް ނިޝާން މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ޤުރްއާނާއި ސުންނަތުގެ އެތައް ދަލީލުތަކުން ހޫރުލްޢީނުންނަކީ ހަގީގަތެއްކަން އެނގި ކަށަވަރުވާ ކަމަށެވެ.
”ކީރިތި ޤުރްއާނަށް އެކަނި ބަލާލި ނަމަވެސް އެތައް ތަނެއްގައި ޙޫރުލް ޢީނުންގެ ވާހަކަ ބަޔާންވެފައިވެއެވެ. (ބައްލަވާ: سورة الدخان: 54، الطور: 20، الرحمن: 72، الواقعة: 23)“ ޝެއިޚް ވިދާޅުވިއެވެ.
އެހެންކަމުން އެ ވާހަކަތަކަކީ ހަގީގަތެއްނެތް ބޭކާރު ވާހަކަ ކަމަށްބުނާ މީހަކު ޖެހޭނީ އަލުން އިސްލާމްވެ ތައުބާ އިޢުލާނު ކުރާން ކަމަށް ޝެއިޚް ވިދާޅުވިއެވެ.
”އެހެން ނޫންނަމަ އެމީހަކު ވާނީ ރަތްލާ ޖެހި މުރުތައްދު ކާފަރަކަށެވެ. އެއީ ރޮޒެއިނާ ކަމަށްވިޔަސް ޖެނިފަރ ކަމަށް ވިޔަސްއެވެ.“ ޝެއިޚް ވިދާޅުވުއެވެ.
ހޫރައްލީނުންގެ ވާހަކަ މުސްލިމުންގެ މުޤައްދަސް ފޮތް ކީރިތި ގުރުއާނުގެ އެތައް އާޔަތެއްގައި ބަޔާންވެގެން ވެ އެވެ. އެކަނބަލުންގެ ރީތި ކަމާއި ބިކުރުވެރި ކަމާއި އެއީ ސޯލިހް އަޅުން ކުޅަ އަމަލުތަކުގެ ހެޔޮ ޖަޒާއެއްގެ ގޮތުގައި ލައްވާފައިވާ ކަނބަލުންތަކެއްކަން ބަޔާންވެގެން ވެ އެވެ. ޤުރުއާންގައި ހޫރައްލީނުން ސިފަ ކުރައްވާފައި ވަނީ ރައްކާތެރި ކުރައްވާފައިވާ ރަންމުތްތަކުގެ ގޮތުގަ އެވެ.
ފެމިނިސްޓުންނާއި އިސްލާމްދީނުގެ އަދުއްވުން އެންމެ ދީނަަށް ފުރައްސާރަ ކުރަން އެންމެ ބޮޑަށް ދައްކާ އެއް ވާހަކަ އަކީ ހޫރައްލީނުންގެ ވާހަކަ އެވެ.
Advertisement
This content is created and paid for by advertisers and does not involve Voice Journalists
