ދިވެހި ފުލުހުންގެ ހިދުމަތާއި ދިފާއީ ބާރު ގުޅިގެން ފަށާފައިވާ ގައުމީ ސަލާމަތާ ގުޅުންހުރި ހާއްސަ އޮޕަރޭޝަނާއި ގުޅިގެން އެއްވެސް ކަންބޮޑުވުމެއް ނެތް ކަމަށް ދިވެހި ހާރިޖިއްޔާ އިން ބުނެފި އެވެ.

ހާރިޖިއްޔާ އިން މިކަން ހާމަކުރީ އިނގިރޭސި ބަހުން މިއަދު ނެރުނު ބަޔާނެއްގަ އެވެ. މިފަދަ ބަޔާނެއް ނެރެފައި މިވަނީ ވަރަށް ކުއްލި ގޮތަކަށް ރޭ ފެށި ގައުމީ ސަލާމަތާ ގުޅުންހުރި ހާއްސަ އޮޕަރޭޝަންގެ ވާހަކަތައް ބައިނަލްއަގްވާމީ މީޑިއާތަކުގައި ޝާއިއު ކޮށްފައި ވަނިކޮށެވެ.

ހާރިޖީ ވުޒާރާއިން ބުނީ މިފަދަ އޮޕަރޭޝަންތަކަކީ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން ހިންގާ އޮޕަރޭޝަންތަކެއް ކަމަށެވެ. ފުލުހުންގެ އިންޓެލިޖެންސަށް ލިބޭ ތަފާތު މައުލޫމާތުތަކާއި ގުޅިގެން މިފަދަ އޮޕަރޭޝަންތައް އަބަދުވެސް ހިންގާ ކަމަށް ބުނެފައިވެ އެވެ.

Advertisement

އެ ވުޒާރާ އިން ބުނީ ފުލުހުންނާއި ސިފައިން ބައިވެރިވާ އޮޕަރޭޝަން ކުރިއަށްދާ ކަމަށާ އެކަމާއި ގުޅިގެން ކަންބޮޑުވުމެއް ނެތް ކަމަށެވެ. އަދި ދިވެހީންނާއި ދިވެހި ގައުމާއި ރާއްޖޭގައި ދިރިއުޅޭ އެންމެހާ ރައްޔިތުންގެ ސަލާމަތާ ރައްކާތެރިކަން ކަށަވަރު ކުރުަސް އަޅަން ޖެހޭ ހުރިހާ ފިޔަވަޅެއް ސަރުކާރުން އަޅާނެ ކަމަށެވެ.

ފުލުހުންގެ އިދާރާ އިން ރޭ ނެރުނު ބަޔާނެއްގައި ބުނީ ގައުމީ ސަލާމަތާ ގުޅުންހުރި ހާއްސަ އޮޕަރޭޝަން ގައި ތިން މީހަކު ހައްޔަރުކޮށް އެ މީހުންނާއި ގުޅުންހުރި ތަންތަން ބަލާ ފާސްކުރަމުންދާ ކަމަށެވެ.

އޮޕަރޭޝަން ކުރިއަށް ދިޔަ ވަރަކުން އިތުރު މައުލޫމާތު ހާމަ ކުރާނެ ކަމަށް ވެސް ބުންޏެވެ.

ގައުމީ ސަލާމަތާ ގުޅުންހުރި އޮޕަރޭޝަނެއް ހިންގާ ކަމަށް ބުނެ ފުލުހުން ރޭ ފުރަތަމަ ނެރުނު ބަޔާން ކުޑަވަގުތުކޮޅެއްގެ ތެރޭގައި ޑިލީޓް ކުރި އެވެ. އެކަމާ ސުވާލުކުރުމުން ބުނީ މިވަގުތަށް ބަޔާން ނެގީ ކަމަށެވެ.

ރޭ ނެރުނު ކުރު ބަޔާނަށް ފަހު މި އޮޕަރޭޝަނާ ގުޅޭ އެއްވެސް މައުލޫމާތެއް ފުލުހުން އަދި ނުދެ އެވެ.